Walo ka mga sakop sa Special Operations Group sa Philippine Navy ang naangol, usa niini naputlan gyud sa iyang kumagko sa kamot, human gidasmagan sa barko sa Chinese Coast Guard ang barko sa Pilipinas nga nipahigayon og re-supply mission paingon sa BRP Sierra didto sa West Philippine Sea.
Gawas nga gituyo sa Chinese Coast Guard og dasmag ang barko sa Pilipinas giingong misaka gyud sa usa sa mga rigid-hulled inflatable boats (RHIBS) sa Pilipinas ang Chinese Coast Guard og gidisarmahan ang atong mga sundawo.
Sigun ni Rear Admiral Alfonso Torres nga ang mga armas alang unta sa mga sundawo nga nadistino didto sa BRP Sierra Madre. Si AFP Chief of Staff Romeo Brawner nagkanayon nga ang mga sakop sa Chinese Coast Guard nga misakay sa RHIBS sa Pilipinas pulos armado og sundang, bangkaw, ug kutsilyo.
Gikatahong misuway og sukol ang mga sundawong Pinoy apan nalupig sila sa gidaghanon sa mga Insik. Ang labing awahing confrontation nahitabo duha ka adlaw human gipatuman sa China ang ilang lagda nga dakpon ang si bisan kinsa nga mosulod sa teritoryong ilang giangkon.
Dili ni unang higayon nga gihimo sa Chinese Coast Guard ang pagpangatake batok sa Pilipinas. Ug sa mga nangaging higayon pulos diplomatic protest ray nahimo sa gobyerno sa Pilipinas bisan tataw nga wa niy epekto ngadto sa China.
Dili mo respitar ang China bisan pila ka milyon pa ka diplomatic protest ang atong isang-at tungod kay wala sila moila niini. Ang labing awahing insidente nagkinahanglan na og mas isog nga aksiyon gikan sa kagamhanan sa Pilipinas.
Tingali duna nay sukaranan nga gamiton sa nasud ang Mutual Defense Treaty uban sa Amerika aron ka protehian ang nga sundawong Pilipino nga mohimo og re-supply mission. Dili kinahanglang makiggubat sa China tungod kay atong angkunon nga wa tay dag-anan ug nga sa gubat wa gyuy modaog.
Tingali bastante na ang presensiya sa pwersa sa Amerika sa mataghigayon nga mohimo ta og re-supply mission aron magpanagana ang China sa pagpanghilabot. Hangtod nga dili ni buhaton sa atong nasud magpadayon ang pagpangatake sa China.