Angayang dawaton ni suspended mayor Michael Rama ang sakit nga kamatuoran nga gibiyaan na siya sa iyang mga kaalyado sa konseho. Pruweba niini mao ang wa nila pagtungha sa gipasiugdahan niyang prayer rally niadtong Independence Day diha sa Plaza Sugbo.
Si Rama dunay 12 ka mga kaalyado diha sa konseho, apil na ang bise mayor nga karon maoy acting mayor nga si Raymond Garcia. Apan sa 12 niya ka mga kaalyado, sila lang si acting vice mayor Dondon Hontiveros, Joy Pesquera, ug SK Federation president Rhea Jakosalem ang mipakita ug misuporta sa kalihukan.
Si Garcia sa iyang bahin miingon nga duna siyay prior commitment atol sa maong higayon. Ang uban niyang mga kaalyado ambot unsay ilang rason. Si konsehal Jun Alcover hinuon mideklarar na nga mobuwag sa grupo ni Rama ug mag-independente. Posibling mosunod pud niya si konsehal Jun-jun Osme a.
Ang ubang mga kaalyado ni Rama nagnukos-nukos pa hangtud ron asa gyud sila paingon. Sa akong tan-aw nag-agad ang kadaghanan nila unsay buhaton ni Garcia ug kun makabalik pa ba si Rama human sa unom ka buwan niyang preventive suspension. Sa laktud naniguro nga makasakay og lig-ong baruto alang sa eleksiyon sunod tuig.
Nakasabot ko ni Garcia kun nganong hangtod ron wala siyay deklarasyon mahitungod sa politika tungod kay di ni makaayo niya. Mas pabor alang niya kun pabilin niyang tipigan ang iyang baraha sa politika ug pasagdang hanging si Rama tungod kay wala ni epekto ngadto niya sa pagkakaron sanglit siya maoy naggunit sa puntil sa syudad.
Ug mosugot ug sa dili si Rama, mas sayon alang ni Garcia pagkontrolar ang mga kapitan ug uban nilang mga lider sa politika sanglit siya maoy dunay gahom sa pagkakaron. Ug dako ang purohan nga malugwayan pa ang pagka-acting mayor ni Garcia hangtod sa eleksiyon sunod tuig sanglit duna pay laing mga kaso nga nag-ong-ong batok ni Rama.
Busa kun nagdahom pa gihapon si Rama nga mag-uban silang Garcia sa moabot nga eleksiyon, angayan tingali nga pukawon niya ang iyang kaugalingon.