Daghan pa gihapon ang wala maka-move on. Subra na sa usa ka tuig sa pangatungdanan si Presidente Ferdinand "Bongbong" Marcos, wala ug tuo ang nag-alburoto tungod kuno sa mga saad nga wala matuman.
Liboan pa gihapon ang sige og paningil sa administrasyong Marcos kon asa na ang tag P20 ka kilo nga bugas nga gisaad kuno ni Marcos atol sa pagpangampanya.
Ambot nganong wala pa makaamgo ning uban. Kahibalo na kita nga dakong milagro gayud ang pag-us-os sa P20 nga matag kilo sa bugas.
Gani sa presyo sa National Food Authority, P25 man ang labing ubos nga kilo sa bugas.
Wala na kitay mahimo ug angay na kita nga mo-move on. Bisan pa'g unsaon pagpaningkamot sa kagamhanan, di na gyud mobahar ngadto sa P20 ang presyo sa bugas dinhi sa nasud. So, di na kita angay maghandom pa.
Hangtud karon, padayong naglisod ang atong mga mag-uuma sa ilang pagtikad sa ilang basakan, maisan, kalubihan ug uban pa.
Kini tungod usab sa ka minus sa suporta gikan sa mga ahensiya sa kagamhanan.
Aduna pay taas nga panahon ang administrasyon ni Marcos nga mopakitang gilas sa kampanya niini pagpalambo sa agrilkultura sa nasud.
Apan kong ugaling kulang kini paningkamot, nan ato na usab nga sunggalon ug paninglan.