Sa tinuod lang kining mga skywalk nga gipangtukod sa atong gobiyerno nahulog ra man ang uban niini nga walay hinungdan kay ang mga tawo mismo nga gibuhatan niini dili man moagi kay hasolan man nga mosaka pa ug palabihon nga molabang sa karsada ug makig patentiro sa mga sakyanan. Kini ang reyalidad sa kinabag-an.
Busa hilasan kaayo ta maminaw nga magbagotbot ang mga tawo kinsa perting nanaway nganong giguba man ang skywalk sa Osmeña Boulevard nga gamit kuno kaayo sa mga tawo ug sayang usab ang kwarta sa katawhan nga gigamit sa pagtukod niining maong proyekto.
Pastilan, kining ga-rant ilabi na sa social media nga nakaagi dihang dapita, segurado gyud kaha nga nag-agi mo sa skywalk? Hinuon naa man gyuy mga maapingon nga mga tawo nga maneguro nga luwas sila nga molabang sa karsada busa mosaka gyud sila sa skywalk.
Obserbasyon lang kining mga skywalk nahimo na kining puy-anan sa mga tawo nga diha ra mangatulog, malibang, mangihi ug ang uban gani manulis sa mga tawo nga moagi ilabi na kon lawom nga kagabhion, inig agi nimo mangalisbo ang kabaho kay lagi wala man puy nagmonitor.
Sige or reklamo sa kahuot sa traffic sa dakbayan, karon nga aduna nay solusyon nga mao ang Bus Rapid Transit kon BRT gisaway ra gihapon kay lagi nagpasamot sa problema sa kahuot sa dagan sa mga sakyanan.
Dili man intawon mahimo nga dili masakripisyo ang convenience sa mga tawo sa pagpatuman niining maong proyekto kay dili man ihaklap lang dayon ang mga dapat niini ug ipabarug nga mora’g magic ug mahuman ug magamit dayon ang BRT.
Inay moreklamo, sabton nalang nato ug dawaton ang kabag-ohan nga ipatuman, dili man perpekto ang execution sa proyekto pero naghatag kini og kasegurohan nga masulbad ang dakong problema nga giatubang sa dakbayan nga puwera gaba intawon hilabihan na gyud ka kahuot ang pagkamang sa mga sakyanan.
Gawas sa pagkat-on sa pagmata og sayo aron dili matanggong sa traffic kong moadto na sa trabahoan o eskwelahan, kat-onan usab nato ang pag inat sa atong pasensiya aron dili ta ma-stress ug ma highblood kay kita ra ang maalkansi, nalangan na ta atakehon pa simbako lang. Ang gitinguha nato nga kausaban alang sa kaayohan giubanan usab kini og kahasol nga angayan usab nato nga dawaton kay sa kauwahian ang mga tawo ra man usab ang mabulahan.