Dunay nianhi nako nga dunay gipamati sa lawas. Ang iyang pamilya sukad pa kaniadto adunay dakong kalambigitan sa witchcraft.
Barang ug usik nahimo sa ilang katigulangan. Ug nituo pud sila niini. Human sa pagkumpisal gisunod dayon ang prayer of renouncement.
Iyang gibati nga nisakit ang iyang ulo. Nga sa ato pa, dunay reaction. Timailhan lamang kini nga dunay suliran ang iyang kaugalingon.
Mao nga gikinahanglan gyud ang follow up labina sa mga sama nila nga open ang occult third eye gumikan sa occult practices sa mga katigulangan.
Ang Dios, Dios sa kasegurohan ug dili sa swerte. Mao kaniya lamang kita mosalig. Dili sa mga padugo, mga patuotuo ug ang pagkonsulta sa mga occult practioners. Ang bisan unsa nga gikan sa nagbansay og witchcraft ang wala gyuy kaayohan nga ikahatag.
Mahinungdanon kaayo nga diha sa pamilya palig-onon ang pagtuo ngadto sa Dios kaysa bisan unsang butang nga dunay kalambigitan sa patuo tuo.
Atong talikdan ang bisan unsang naandang mga buhat nga napanunod nato sa katigulangan apan nakapahilayo diay nato gikan sa Dios.
Ang tumang pagsalig sa mga barangan ug usikan usa ka dakong sala batok sa Dios ug sa atong pagtuo.
Angayan nato kining hunongon pinaagi sa renouncement prayers ingon man ang pagduol sa mga sakramento nga tinukod sa atong Ginoo.