Naukay ang mga marites sa social media kon si kinsa gyud ang naka-hit and run sa batan-ong basketbolista nga si Jeslar Uriel Larumbe kinsa namatay gyud intawon human sa iyang gidangatan niadtong adlawng Domingo sa buntag diha dapit sa Redemptorist Church sa Barangay Camputhaw dakbayan sa Sugbo.
Nagtuo dayon ang mga tawo nga VIP ang sakay sa sakyanan kay naanad man nga VIP gyud kon adunay makita nga mga ingon niini. Gidamay pa ang ubang mga opisyal sa dakbayan ug bisan gani ang ubang mga ahensya kagamhanan, murag nasakyan dayon og politika.
Karon base sa resulta sa imbestigasyon sa kapolisan dili man intawon VIP ang tag-iya ug driver sa grey SUV kay yanong lungsoranon nga naggaragara lang nga nigamit og blinker aron makamintaha sa uban ug makaabusar sa karsada.
Kining maong hitabo makapukaw usab sa atong mga ahensiya sa kagamhanan nga aduna diay mga tawo nga nag gamit og blinker nga gikinahanglan nga tutokan nila kay dako kaayo kini nga kalapasan sa balaod. Gani bisan og opisyal pa sa gobiyerno kong dili gyud gikinahanglan nga mag blinker dili gyud pwede kay gikinahanglan sundon ang balaod.
Human sa Aquino ug Duterte administration nigara og balik kining mga abusado sa karsada nga mora g sila ang hari pinaagi sa paggamit blinker ug wangwang sa karsada. Gani kining suspek karon sa kaso ni Larumbe niangkon nga namaligya og blinker ngadto sa mga tawo nga gustong mobutang niini sa ilang mga sakyanan.
Pila kaha ka mga tawo ang adunay susama og pangutok ang nagtiner og blinker karon nga mangilad aron dali nga makaagi sa karsada ilabi na kong traffic kaayo ang panahon. Base sa kasayoran sa kapolisan nga dugay naman diay kining tawhana nag gamit niining blinker nga mo-counterflow pa gani.
Duna naman untay balaod mahitungod niini busa gikinahanglan nga gamiton kini aron masumpo ang mga abusado sa karsada ug silotan kadtong mga masakpan nga mogamit. Sayon ra man sila dakpon kay makita ug madungog ang ilang gihimo, basta molihok lang ang mga hingtungdang ahensya seguradong madakpan gyud sila.
Kining nahitabo ni Larumbe, giingong nasaghiran gamay sa iyang motor ang SUV kinsa ang driver na-trigger ug iyang gisundan ang biktima kinsa nahadlok intawon niadtong tungora kay duna lagi blinker maong nipasutoy kini og padagan apan gidumbol na hinoon sa suspek.
Unta sa panghitabo dili lang ang pagkab-ot sa hustisya kon dili pagsumpo usab sa mga badlonong ug abusado sa karsada ang mamahimong bunga niini.