Ang sala dili matawag nga act of man kondili human act. Human act tungod kay kuyog niini ang kabubut-on, ang kagawasan, ingon man ang kahibalo.
Ang act of man mao kadtong mga buhat nga pinasikad lamang sa basic instincts sa tawo sama sa kagutom, kauhaw etc.
Matag sala dunay tugbang silot. Matag sala dunay tugbang tulubagon nga angayang tubagon sa makasasala.
Dunay mga sala nga pagaisipon natong krimen sanglit supak man sa gilatid nga balaod busa ang nakahimo sa ingon gukdonon sa balaod. Pinaagi sa makiangayong proseso makab-ot ang kaangayan nga sa ato pa, ang paghatag kun sa unsay husto ug angayan.
Apan luyo ning tanan ang mga masalaypon ingon nga mga tawo nagkinahanglan man usab og kaluoy. Kay lagi gikaligotgotan nato ang sala apan angayan natong kaluy-an ang mga makasasala.
Apan kining maong panahom malisud man gyud tugkaron ilabina kun dulot sa bukog ang kasakit nga gihambin nga kasakit gumikan sa kapintas ug kabangis sa mga tawo nga kanato miabuso.
Lisud kaayo ang paghangop sa nakasala kanato labina kun kita naputos sa pagdumot. Ang pagpasaylo usa man ka panaw. Ang pagpasaylo usa man ka dakong hagit ug ig-alampo kaayo.
Diha sa pagkab-ot sa tinuoray nga kalinaw, kinahanglan gyud ang pagpasaylo sa kaugalingon ug sa nakasala kanato. Ning paagiha mamahimo kitang gawasnon sa anino sa atong kagahapon.