Si Sofia Bacolod, hepe sa Billing and Collection Section sa Cebu City Transportation Office, mihatag og rekords kon pila ang parking fee collections sa CITOM kaniadto sa wa pa mobanos ang Tokagawa sa pagdumala sa mga designated roadside parking areas.
Matud ni Bacolod nga sa tuig 2013, ang parking fee collections sa siyudad miabot og kapin sa P42 milyones; dayon P38 milyones kapin pagka 2014, unya P36 milyones pagka 2015; unya P33 milyones sa 2016, misaka kini ngadto sa P38 milyones pagka 2017, ug P39.9 milyones pagka 2018.
Pagsugod sa Tokagawa pagdumala sa parking areas sa siyudad, ang downtown ra ang ang gipadumala kanila base sa kontrata, ug ang uptown parking areas gidumala gihapon sa CITOM.
Sa uptown lang, ang mga parking attendants sa CITOM mikolekta og P20 milyones sa 2019; unya P12 milyones sa 2020; P17 milyones sa 2021, ug P7 milyones pagka 2022.
Tan-awa, dili ba dagko ang kantidad nga nakolekta sa uptown lang gani?
Human na-renew sa Tokagawa ang ilang kontrata sa siyudad kaniadtong 2022 ug molungtad kini sa 2025, sila na gyud ang nagdumala sa tanang roadside parking areas sa tibuok dakbayan sa Sugbo, downtown ug uptown area.
Tungod niini, ang COA miingon nga natan-aw nila nga nabentahaan gyud ang siyudad sa Sugbo sa pagbahinay sa koleksyon kay midawat lang ang siyudad og bahin nga P8.7 milyon sa usa ka tuig. Usahay mohatag og konsuylo ang Tokagawa, pasubrahan nila g gamay ang ihatag nga share sa siyudad.
Ang Tokagawa miingon nga kaniadto kuno panahon sa pandemic, gamay ra sila g koleksyon kay wa man kaayo y mga sakyanan nga namarking, pero mibayad gyud gihapon sila sa P8.7 million nga guaranteed minimum income para sa City Hall.
Diha hinuong bahina, midayeg ko sa Tokagawa kay katuohan man gyud nga gamay ra sila og koleksyon atol sa pandemic, unya mibayad sila sa gilatid nga P8.7 million nga guaranteed minimum income sa siyudad.
Ang COA mirekomendar nga angay ng i-terminate sa siyudad ang kasabotan tali sa Tokagawa, apan kon gusto ang mga opisyal sa Cebu City nga ipadayon ra ang kontrata pagtugyan sa Tokagawa sa pagdumala sa mga roadside parking areas, kinahanglang usbon ang sistema sa pagbahinay sa koleksyon.
Ang Cebu City Council miduso niining maong isyu ngadto sa opisina ni Mayor Michael Rama, kay executive decision man ni, ug kon unsay desisyon sa mayor, moagi ra kanila ang kontrata.
Karon, unsa may baruganan ni Mayor Rama niining mao nga isyu? Tumanon kaha ni Mayor Rama ang rekomendasyon sa COA nga i-terminate ang kontrata sa siyudad ug sa Tokagawa?