Angay gyud unta nga ayohon pagtangtang ang mga “beam” ug ubang kagamitan sa skywalk nga ipakuha gikan diha sa Osmeña Boulevard sa Cebu City, ug dili kay pangkupogon lang.
Aron kapahimuslan pa kini kay plano ra ba ni Mayor Michael Rama nga ang skywalk nga kuhaon gikan sa Osmeña Boulevard, tukoron pagbalik adto sa SRP.
Tan-aw nako, mora’g dili gusto nga makagasto og dako ang kontraktor sa Bus Rapid Transit (BRT) ug gusto ra nila nga pangkupogon ang mga lig-on kaayong mga semento nga beam.
Si Engr. Pet Dakay, sakop sa Cebu City Traffic Management Board nga usa usab ka kontraktor, mitudlo sa BRT project manager kon unsaon pagtrabaho sa pagtangtang sa skywalk.
Ang dagkong mga beam nga gihimo sa semento, gihulma nang daan, ug gipatong ra sa mga haligi sa skywalk, dayon gibutangan og mga dagkong bolt aron nga dili magbuwag.
Matud ni Engr. Dakay nga hilabihan kasayon sa pagtangtang niini pinaagi sa paggamit og crane, aron maoy moalsa sa mga beam, apan mora’g way gana ang project manager sa BRT.
Klaro kaayo nga naglikay sila sa dakong gasto, mao nga tinguha nila nga deritsohon ra sa pagkupog ang mga semento. Sus, kaanugon sa mga beam.
Ang usa ka skywalk kaniadto gigastohan og tag P4.5 milyones sa kagamhanan pinaagi sa Countrywide Development Funds (CDF) ni Kongresista Raul del Mar.
Husto kaayo ang plano sa mayor nga kon tangtangon man gyud na diha sa karsada nga agianan sa BRT, ayuhon kini sa pagtangtang aron magamit pagbalik didto sa SRP.
Ang usa sa rason sa BRT project manager nga kon hinayon nila pagtangtang ang mgabeam ug ubang kagamitan sa skywalk, dugay kaayo sila nga mahuman.
Aw, kon gamay ra sila og mga tawo nga motrabaho, madugay gyud. Balikon nako, wa gyud ko malipay niining pagmugna og BRT project kay dili gyud kini makasulbad sa problema sa traffic dinhi sa siyudad.
Nagtoo ba kamo nga sa ubang nasud malampuson ang tanang mga BRT project? Dunay 165 ka siyudad sa lainlaing dapit sa kalibutan nga naghimo og BRT projects, apan ang uban niini wala magmalampuson.
Ang BRT nagsugod gyud didto sa Latin America, ug ang BRT sa Columbia maoy gihulagway nga malampuson kaayo ug nahimong inila.
Sa New Delhi, India gitangtang na nila ang ilang BRT line tungod kay sama sa ubang mga siyudad nga nagpatuman niini, wa gyud magmalampuson.
Dinhi sa atong siyudad, unsaon pagmalampuson sa BRT nga imbes makasulbad ni sa traffic, makapasamot man hinuon kini.
Aw, matud sa mayor nga maoy nagsugyot niining BRT, ang katuyoan sa BRT mao ang pag-transport sa katawhan, ug dili kay ang paghatag og kasayon sa mga nanag-iya og sakyanan.