Usa balay patantuhan sa dalan Colon sa Cebu City ang gitulis sa mga armadong kalalakihan kagahapon sayo sa buntag adlaw nga Sabado, Nobiyembre 25,2023 sumala pa sa mga balita.
Matud pa, nakigdungan sa mga empleyado sa pagpangabli sa maong establisamento ang mga tulisan nga atol ning pagsuwat wala pa matino kun pilay kantidad ang nasakiyo.
Way polis sa lugar atol sa pagkahitabo mao nga walay nadangpan ang mga pobreng empleyado.
Matag naghinangat ang Pasko, daghan sa katawhan ang nanghinam-hinam na kun unsay pamaliton kay aning mga panahona abunda sa kwarta ang mga tawo tungod tinghatag naman gud sa mga nanarbaho sa ilang 13th Month Pay ug ang uban makadawat pa gyud og Christmas bonus. Matag duol na ang Pasko modagsa sab gikan sa lain-laing mga lugar ang nagkalain-laing grupo sa mga tulisan, kawatan, mangingilad, mangunguot ug uban pang matang sa modus operandi nga nangita ra og binta aron kuhaon ang hinagoan sa uban.
Ning bag-o, ang Cebu City Police Office namahayag nga hugot ilang intelligence monitoring pagbantay sa mga dautang elemento nga mohimo og mga krimen dinhi sa dakbayan.
Apil niini ang mga dayo o kadtong mga grupo sa mga kriminal gikan sa nagkalain-laing lugar nga tuyong moanhi sa Sugbu aron mamiktima.
Ang Cebu City usa sa mga adunahang siyudad sa Pilipinas kay daghang mga negosyo dinhi ug gatosan ka libo ang mga nanarbaho.
Aduna kini sobra usa ka libong polis aron pagsiguro sa seguridad og kaluwasan sa tanan. Apan bisan pa niini dili exempted sa mga kriminal ang Cebu City. Nangita ra sila og buslot sa estratehiya sa mga polis aron makabiktima.
Dili na bag-o sa Cebu City kining mga susama niini nga krimen, kay nahitabo na kini kaniadto dili lang kay makausa kondili makadaghan sab ka higayon. Dili lang kay pawnshop ang gitulis kondili hasta mga bangko bisan udtong tutok. Apan bisan sa kadaghan sa mga polis, kuwang pa gyud kini tingali kay nagkadaghan man ang gibantayang balay patigayon ug nagkadako sab ang populasyon niini.
Posible sab nga kinahanglang usbon sa kapolisan ang ilang estratehiya matag karon ug unya aron dili makahigayon ang mga kriminal.
Maayo tingaling tun-an pagbalik sa CCPO ug sa kadagkoan sa siyudad kining bahina.