Subo kaayo palandungon nga ning panahon nga naay krisis sa bugas ug mahal ang petrolyo, dunay tensiyon sa West Philippine Sea ug uban pa nga nagpalisod sa kinabuhi sa mga Pilipino, adunay manngawas nga balitang destabilisasyon.
Ang maong report matud pa gikan mismo sa baba sa kasamtangang Armed Forces of the Philippines Chief nga si General Romeo Brawner Jr. nga dali sab giklaro sa tigpamaba sa AFP nga nasayop pagsabot sa uban ug nalahi na hinuon ang kahulogan.
Ang Pilipinas nag -enjoy karon sa kalinaw gumikan sa pagmenus na sa mga armadong engkwentro tali sa mga tropa sa gobiyerno ug niadtong mga pundok nga gustong gub-on ang kahapsay ug kalinaw sama sa insurhensiya o rebelyon ug sesesyonista ug terorismo ilabi na didto sa Mindanao.
Gikinahanglan kayo sa Pilipinas ang panaghiusa sa tanang Pilipino karong ang nasud nagsagubang og daghang krisis nga gipaningkamotan sa tanan nga masulbad.
Mas labing gikinahanglan sa nasud ang panaghiusa atubangan aning hulga gikan sa China nga wala mopakita og timailhang moatras sa ilang illegal nga pagpangilog sa mga teritoryo sa Pilipinas.
Wala kinahanglana sa nasud ang pagkawatak-watak sa mga tawo tungod lang sa pipila ka personal nga interes sa mga impluwensiyado ug gamhanang mga indibidwal, ilabi na kun mabaw ra kaayo ang rason.
Ang mga ingon niini nga klase sa mga impormasyon, matinuod man o dili, dili kini makatabang sa kasamtangang sitwasyon ug makasamot na hinuon unya sa pas-unong krisis sa mga Pilipino.
Mabalhin sab ang atensyon sa gobiyerno palayo sa mas importanteng kinahanglang unahon.