Bisan og unsaon sa pag-amping sa karsada kong ang uban magdanghag madisgrasya gyud gihapon. Sama nalang sa nahitabo didto sa lungsod sa Carmen lalawigan sa Bohol diin adunay tulo ka kinabuhi ang nakalas samtang aduna usay naangol human nidaro sa kongkretong ali o barandilyas sa tulay nga ilang gianan. Nakatulog kuno ang driver maong nahitabo ang disgrasya.
Niining bag-o lang didto usab sa Malaybalay, Bukidnon, ang akong yutang gigikanan, naay usa ang nakalas ug laing mga tawo ang grabeng naangol human gidalo sa usa ka SUV nga gimaneho sa usa ka babayeng magtutudlo ang tindahan og prutas.
Matud sa nagmaneho nga nakatulog sad siya ug wala na masayod nga nakadisgrasya na siya. Maayo nalang kay wala siya naunsa apan ang iyang gibanggaan ang nadisgrasya gyud ang kinabuhi.
Magpaduol ta sa dakbayan sa Sugbo diin nadaro usab sa usa ka SUV ang unom ka mga tawo nga naglakaw sa daplin sa karsada sa baranggay Talamban kagahapong adlawa lang ni.
Wala sila magdahum nga sa ilang pagpangampanya sa umaabot nga eleksiyon sa barangay mahiagom sila niadtong aksidente.
Ang driver sa SUV niangkon nga nakatulog usab siya samtang nagmaneho kay gikan man siya sa iyang trabaho isip call center agent ug pang gabii ang iyang oras sa trabaho.
Dili lang kini nga mga aksidente ang nahitabo tungod kay gaduka ang driver nga nagmaneho sa sakyanan.
Nakasuway baya usab ko aning bation ta og duka samtang mag-drive sa sakyanan nga mora’g gadamgo ka na ug makuratan nalang ka nag-drive pa man diay ka sa sakyanan.
Busa matag dukaon mangita gyud ko og daplin og motagpilaw kadyot.
Kasagaran gud basta magdali sa adtoan imarka bahala ang tanan kay lagi gustong makaabot sa dapit padulngan.
Makaabot man og dali apan didto sa langit o ba kaha sa impiyerno tungod kay wala na matan-aw pa ang safety dili lang sa kinabuhi sa driver kon dili ang kinabuhi sa tanan nga tawo nga madamay sa aksidente.
Dili kapangantihan ang karsada kay walay maayong laki nga driver basta magdanghag segurado nga mahiagum sa trahedya. Busa kanunay tan-awon nato ang tanan dili lang ang makina, ligid ug uban pa kon dili ang kondisyon sa lawas sa mga sakay ilabi na sa mga driver kay sa ilang palad mismo nakatungtong ang kinabuhi sa mga tawo.
Labaw sa tanan kanunay mosampit sa Ginoo nga ilikay sa disgrasya.