Sa nagpadayon nga gubat sa Israeli forces ug sa Palestinian Hamas militants, ang mga inosente nga kinabuhi ang nasaksripisyo ilabi na ang mga bata. Makapakitbi sa atay ug makapahilap sa kasingkasing nga makita ang kahimtang sa mga namatay ug naangol sa gubat nga nahitabo didto.
Gani upat ka mga kababayan nato nga Filipino ang nakalas sa nahitabong gubat ilabi na didto sa Gaza. Dili nako ma-imagine ang kalisang nga gibati nila sa higayon nga moatake ang masigka habig labi na nga mga ngilngig nga mga armas ang ilang gigamit.
Naa may mga bomb shelter ang mga balay didto apan wala gihapon mosaler kay liboan man ka mga tawo ang namatay.
Unsa kaha kong simbako lang mahitabo sa atong nasud ang nahitabo didto sa Israel ug ang nahitabo usab sa Rusia ug Ukraine? makasugakod kaha ang Pilipinas kong ang China ang ikagubat?
Unsaon kaha pagsagang sa atong nasud ang advance ug gamhanang mga armas sa China?
Gipanguyawan ko sa mosunod nga panghitabo kay sige na og hinagitay ang Pilipinas ug China sa claim nato sa West Philippine Sea kada hatod og supply ngadto sa mga sundalo nga nakapwesto nasangad nga barko, hapit na magkabinanggaay.
Ning bag-o lang.diay nagkabangga na gyud ang barko sa Pilipinas ug ang Chinese militia boat. Gamay'ng paghaling sa kasamok mosangpot kini sa pagsilaob sa gubat sa duha ka nasod. Pastilan sa tinuod lang wala pa gyuy ikasarang ang atong armas batok sa China.
All out support kita sa sa claim nato sa West Philippine Sea kay ato man gyud na ug gikinahanglan nga pakigbisogan ug kong gikinahanglan pakamatyan. Lisod gyud kong atong ipatigbabaw ang hambog o garbo kay kong mahitabo ang gubat dili lang mga sundalo ang mamatay apil usab ang mga inosenting sibilyan. Wala ra ba kitay mga bomb shelter nga pwedeng katagoan.
Sakto kaniadto si kanhi Presidente Duterte nga dili magpatugatuga og pakig gubat sa China kay wala ra gyud kitay ikasukol kanila. Ang atong mga air assets ang uban outdated na, naa seguroy uban nga moderno apan dili gihapon makasarang batok sa China.
Mag-ampo nalang ta nga ang nahitabo sa ubang nasud dili mahitabo sa Pilipinas kay luoy ra gyud kaayo kita kong maamong sa gubat simbako lang.