Oktubre 15, 2023: Ikakawhaag-walo nga Domingo sulod sa tuig (Indigenous People’s Sunday)
Mga Pagbasa: Is. 25;6-10a/Sal. 23/Fil. 4;12-14, 19-20/Mt. 22;1-14
Maayong Balita
Nangandam ang hari sa kasal sa iyang anak. Mao nga naghikay gyud siya ug giandam ang tanan alang sa usa ka dakong kumbira sa kasal.
Apan daghan sa mga gidapit ang namalibad sa maong pagdapit mao nga nakahukom na lang siya nga si bisan kinsa na lamang ang dapiton.
Tinuod napuno man ang dapit diin nahitabo ang kumbira apan dili tanan nila ang nahimong kwalipikado. Sa dihang duna siyay nakita nga wala magbisti sa saput alang sa kasal siya gitambog man ngadto sa gawas sa kangitngitan diin didto magkagot ang iyang mga ngipon. Daghan tuod ang gidapit apan diyotay lamang ang napili.
Kasinatian
Dili ikalimod nga buot natong mamahimong malangkubon diha sa atong pakigsandurot sa atong isig ka ingon. Daghan nato ang nahimong gidapit gyud unta sa talad kan-anan sa Ginoo. Apan subo palandungon nga daghan u sab kanato ang nagdumili sa pagsanong niini gumikan sa atong nagkadaiyang mga rason. Kining maong mga rason usahay taphaw lamang kaayo ug kalibutanon. Ang atong mga kalibutanong mga tumong ug katuyoan mao man ang nakababag man sa maong maanindot nga panagtagbo tali sa Dios ug kanatong mga tawo.
Ang Santos nga Misa nga mahinungdanon gyud kaayo unta ang nahimo man hinuong pakapin na lamang. Sa laing bahin dunay proper dress code ang gihatag ang Hari ug kining maong dress code dili lamang kalabot sa aktwal nga bisti nga pagasul-obon sa kasal. Hinunoa, ang buot ipasabot sa Hari sa mga Hari mao man ang kun unsay anaa sa kasingkasing sa matag tawo. Ang Dios dili malipay sa mga halad sinunog kondili sa mga mapaubsanong Espiritu ug sa mahinulosolong kasingkasing.
Lihok
Mahimong makighiusa kita sa ubang mga tawo apan wala kini magpasabot nga atong isakripisyo ang atong pagtuo tungod ug alang sa gitawag nilang malangkubong panaw ug panagdait.
Pangamuyo
Ginoo himoa kaming makamatngon nga bisan tuod nga ang tanan maghiusa, unta makita namo nga dunay limitasyon ug dunay sukaranan nga angayang sundon. Unta mamahimong limpiyo ang among kasingkasing alang sa kahimayaan sa imong ngalan. Ikaw nga buhi ug Hari hangtud sa kahangturan. Amen.