Nindot bitaw kining gihimo sa Sugbo Bike Lanes Board ug sa Cebu City Council nga ipangrehistro na gyud ang mga bisekleta nga magdagan dinhi sa siyudad.
Dugay ra kaayo ko nga nagsugyot niini kay nakahinumdom man ko nga ang among bisekleta kaniadto, girehistro gyud ug gani duna may metal plate numbers.
Dili na lang ko kahinumdom kon pila y bayad sa pagparehistro sa bisekleta kaniadto, ug hatagan ka og plate numbers apan butangan og serial numbers ang bisekleta.
Karon, ang mga konsehal sa Cebu City naghimo og City Ordinance 2408 nga nagmando nga kinahanglang irehistro na gyud ang mga bisekleta, unya way bayad.
Siyaro og magdili-dili gihapon sa pagparehistro ang mga nanag-iya g bisekleta nga wa man ni bayad? Nindot kaayo nga kadtong mga bisekleta nga wa irehistro, multahan ang tag-iya.
Hain man ang gusto ninyo, irehistro nga way bayad, o multahan mo kon masakpan nga migamit og bisekleta nga wa marehistro?
Ang akong sugyot nga kinahanglang estriktohon usab sa mga sakop sa Sugbo Bike Lanes Board nga gipangulohan ni Bernard Maraasin ang papanakop sa mga badlongong bikers.
Ang gipasabot nako kanang mga bikers nga bisan og stop ang signal sa traffic lights, hala moderitso gyud gihapon sa pagpadagan.
Kay wa may lisensiya ang seklista, kinahanglang sakmiton ang ilang bisekleta ug isyuhan sila og citation ticket kon makahimo og sayop sa pagmaneho, ug iuli ra ang ilang mga bisekleta kon makabayad na sa multa.
* * *
Kon hatagan man gani sa kagamhanan og cash assistance ang mga rice retailers aron pagtapak sa ilang alkanse kay gimando man ni Presidente Marcos nga kinahanglang dili molabaw sa P45 ang kilo sa ilang ibaligyang bugas humay, angay sab nga silotan sila kon mahal gihapon ang ilang baligya.
Sayonan ka nga daghan man gihapong namaligya og bugas-humay nga mahal gihapon ang ilang gibaligyang bugas? Wa man sila motuman sa kamandoan ni Presidente Marcos nga gipaagi sa Executive Order 39.
Kinahanglan nga ang Department of Trade and Industry (DTI) motinuod sab sa pagsilot sa mga negosyante nga mapahimuslanon sa higayon.
Basin og magkangkang lang ang ilang mga kamot pagdawat sa tag P15,000 nga cash assistance unya diay dili gihapon nila paubsan ang prisyo sa ilang mga baligyang bugas.
Hangtud karon mahal gihapon ang prisyo sa mga baligyang humay diha sa kamerkadohan ug sa mga tindahan sa lainlaing kabarangayan. Angay nga suroyon kanunay sa mga kawani sa DTI ang lainlaing mga baligyaanan og bugas aron masakpan nila kadtong mga midawat og cash assistance apan wa mopabarato sa ilang mga baligya.