Daghan sa mga tawo karon ang mahiligon kaayo sa mga online games. Gani dili ta makaingon nga mga bata lamang ang mahimong ma adik niini. Lakip n apud tingali ang mga dagko kun mga hamtong.
Apan subo palandungon nga daghang mga hamtong na ug gani hapit na ma senior ang naulipon sa mga online games nga tungod niini dili na hinuon sila makahimong og bisan unsa nga mas produktibo ug mas kakitaan aron mabuhi ang pamilya.
Dunay kaila nako nga nagkanayon nga nga ang iyang kapikas ang wala na lang gyud laing mahimo gawas ang pagpunay og atubang sa computer aron moduwa samtang siya pasagdan lamang nga maoy maningkamot alang sa pamilya. Maayo pa kaha kini? Makaingon tang dili tuod normal sa edad.
Makaingon ta nga ang bisan unsang subra dili makaayo ug makaingon ta nga mamahimong dakong suliran kun ang atong hilig nakapalayo naman hinuon nato gikan sa naandang kutay sa kalambigitan gumikan kay pinaagi sa atong gikabuangan kita nahilansang. Atong gihimo hinuon k ining atong kalibutan bisan pa man kun sayud ta nga dili maayo ang linugdangan sa maong buhat.
Mahinungdanon ang kalambigitan. Ingon nga tawo taas ang gipaabot gikan kanato ug kini mao ang atong pagka responsible sa bisan unsa nga atong pagahimoon. Dili maayo nga kalipay lang nato ang atong hunahunaon. Mahinungdanon usab nga atong hunahunaon ang atong isigkaingon, ilabina sila nga naapektuhan sa atong pagkamapasulabihon.