Agosto 6, 2023: Mahimayaong pagkausab sa panagway sa Ginoo (St. John Mary Vianney Sunday)
Mga Pagbasa: Dn. 7;9-10, 13-14/Sal. 97/2 Ped. 1;16-19/Mt. 17;1-9
Maayong Balita
Nitungas sila sa Bukid sa Tabor ug sa maong bukid nakasaksi ang kapid-an sa mga tinun-an sa atong Ginoo lakip na si Pedro ang ang mahimayaong pagkausab sa panagway sa atong Ginoo. Sa maong mahimayaong kasinatian, nitungha ang duruha ka mga mahinungdanong personahe sa Karaang Tugon sila si Moises ug Elias. Sila kadtong nisalamin sa balaod (Moises) ug ang katumanan sa panagna sa mga propeta (Elias). Nahimong sentro sa ilang kukabildo mao man ang taliabot nga kasakitan nga sination sa atong Ginoo.
Kasinatian
Si Pedro ang nakalitan sa maong kasinatian. Ug kay alang niya bililhon kining maong panagtagbo mao nga nisugyot siya nga kun mahimo tukuron ang tulo ka mga payag alang nilang Jesus, Elias ug Moises. Kini aron mas matagamtaman pa gyud ang maong esena. Apan human madungog ang tingog nga nagkanayon: “Kini siya ang pinangga kong Anak, pamati kamo kaniya!” nahibalk sa naandan ang tanan. Bugtong si Jesus na lamang ang ilang nakita.
Lihok
Karong semanaha atong buhaton kining mosunod:
1. Pagpuyo kanunay diha sa presensiya sa Dios. Isipa nga kuyog gyud nimo ang Dios gikan sa buntag hangtud sa gabii nga tungod niini ikaw magbinuotan tungod kay naa ang Dios nagsud-ong kanimo.
2. Paggahin og panahon sa paghilom ug pagpamalandong.
3. Ayaw isipa ang pag-antos ug pagsulay ingon nga silot. Hinumdomi dili kita mahigugma ug makasabot sa Dominggo de Gloria kondili kita Moagi sa Domiggo sa Pasyon kun kasakitan.
Pangamuyo
Ginoo ania kami nagkapundok aron makigsuod kanimo. Ayaw palayo kanamo, sulod sa among kinabuhi aron diha sa among pagsaulog sa imong makahupay nga pulong mamahimo untang masinati ang imong presensiya sa uban pinaagi sa among presensiya ngadto kanila. Ang among presensiya mamahimo untang panalangin alang sa uban. sa among pagpiskay padulong sa langit dili unta namo likayan ang kalbaryo ingon man ang krus nga mahinungdanon kaayo alang sa among kaluwasan. ikaw nga buhi ug hari hangtud sa kahangturan. Amen.