Mao kini ang gisulti ni Russell Crowe samtang nakighinabi siya sa Demonyo, sa salidang The Pope’s Exorcist. Kini tungod kay ang demonyo nagkanayon man: “Deus Non Est Hic” nga nagpasabot og Wala dinhi ang Dios! Mao nga nitubag si Padre Gabriel nga Bisan asa anaa ang Dios! Hinuon dili gyud maisip natong accurate ang maong film ug usa lamang kini ka dakong fiction. Gihimong sukaranan niini ang kinabuhi ni anhing Padre Gabriel Amorth ang Chief Exorcist kaniadto sa Vaticano. Sikat kining maong film nga nakahatag og kaikag aron magpkasiyod kalabot sa gahum sa kangitngit.
Deus Ubique Est! Bisan asa anaa ang Dios panultihon nga nagdapit kanato sa pag-ingon: Sit Nomen Domini Benedictum nga nagpasabot og Daygon ang ngalan sa Dios.
Kuyog sa maong pagdayeg sa ngalan sa Dios mao man ang pagpuyo diha sa iyang presensiya adlaw adlaw sa atong kinabuhi.
Pinaagi lamang sa paghimo sa ingon nga kita mamahimong seguro nga kita gipanalipdan sa Dios ug nanlimbasog nga mohimo og bisan unsang Diosnon agig paghimaya sa iyang ngalan.
Kun anaa lamang kita sa presensiya sa Dios dili gyud kita makahunahuna og himo og bisan unsang dautan.
Deus in Unoquque Nostrum nga sa ato pa anaa ang Dios sa matag usa kanato. Ning maong kapasikaran nahimong mas makahuloganon ang atong pagsud-ong sa atong isigkaingon ingon nga gilalang sumala sa dagway ug kasamahan sa Dios.
Deus Vult! Kabubut-on kini sa Dios ug angayan lamang nga sa kanunay siya pagasundon. Amen!