Ang maayong balita mao nga di tinuod nga kutob na lang sila karong Mayo. Ang taktakunon nga mga opisyal magpabilin sa puwesto hangtod pa sa Hunyo. Kay Mayo 9 pa man malibkas ang usa ka tuig nga ban sa pagtudlo sa mga nangapilde sa niaging eleksiyon.
Pero ang di maayong balita mao nga inihap na lang ang malipayon nilang mga adlaw. Nalugwayan diay sa katungdanan di tungod sa ilang track record. Kon dili tungod kay itingob ang pagpanudlo sa suod nga mga alyado sa administrasyon sa labing importanteng mga puwesto.
* * *
Pildero sa niaging lokal nga eleksiyon dinhi sa Kabisay-an ang akong nahibaw-an nga seguro nang itudlo sa gabinete lapas sa Mayo 9. Igo lang hinuon siya nga ibalik sa puwesto. Nga iyang gihuptan sa nangaging mga administrasyon sa wa pa mag-politiko.
Ang balikan niyang departamento, kay wa may klaro nga liderato sa pagka karon, naputos sa dagkong krisis ug eskandalo. Gilaoman siya nga maoy labing haom sa kanhi trabaho. Kana kon isipon nga ebidensiya sa kasuhito. Ang gidak-on ug gidaghanon sa mga kasong pagpangawkaw nga gipasaka batok niya kaniadto.
* * *
Duha sa labing kontrobersiyal nga regional directors dinhi sa Sugbo ug Central Visayas ang gitakda nga pabakasyunon na karong Hunyo:
• Ang una gipasanginlan nga dunay gipaboran nga dagko nga mga negosyante ug suod nga mga higala sa mga transaksiyon sa iyang opisina; ug
• Ang ikaduha gipasanginlan nga nigamit sa iyang ahensiya sa kampanya sa niaging eleksiyon ug nanggukod sa iyang giisip nga mga karibal nga nangambisyon sa iyang puwesto.
* * *
Managlahi ang reaksiyon sa duha ka opisyal sa nag-ung-ong nilang pagkalagpot sa puwesto: Ang usa puwerteng hiloma, wa magtagad pagtubag sa seryuso nga mga pasangil batok niya; ang laing opisyal puwerteng agresiboha nga niapiki sa iyang mga sakop nga nahibaw-ang gi-interview sa ilang central office para sa posibleng promosyon.
Posibleng managlahi sab ang ilang dangatan human matangtang sa gobiyerno: Ang usa nanghinaut tingali nga ang pagpakahilom makapabugnaw sa namasangil nga mga grupo sa pagkiha niya sa Ombudsman; pero ang ikaduha, duna nay nag-ung-ong nga mga kaso ug makapaabot og mas daghan pang kaso kay dunay natamakan nga dagko og kalyo sa iyang kamapalabi-labihon sa puwesto.
* * *