Dear Atty. Divine,
Duna koy napalit nga yuta og aduna nay gipirmahan nga Deed of Absolute Sale ang nagbaligya ngari nako last year. Apan wa nako mapanotaryuhi sa abogado kay wa pa koy budget para pag-process sa transfer that time.
Karong bag-o, miadto ko og abogado kay ako na unta nga panotaryuhan aron ma-process na nako ang pag-transfer, di man monotaryo ang abogado kun dili moadto sa iyang opisina ang nagbaligya? Wa na ra ba koy contact sa seller. Unsay angayan nako nga buhaton? Dili diay makanotaryo ang abogado bisan pa kun adunay ID ang nagpirma? Daghang salamat.
Willy
* * *
Dear Willy,
Basi sa Notarial Rules, ang notary public dili mamahimo nga monotaryo sa usa ka dokumento kun wa ang presensya sa nagpirma niini og kinahanglan sab nga mopakita og competent ID or government issued ID ang mipirma sa dokumento.
Kini gitumong aron pagseguro sa identity sa tawo nga nagpirma sa dokumento og boluntaryo gyud nga mipirma atubangan sa notary public.
Ang maayo nimong buhaton mao ang pagpangita sa seller ug kinahanglan gyud nimo siyang dad-on sa abogado alang sa pagpanotaryo sa Deed of Absolute Sale kay kun di nimo mapanotaryuhan ang imong dokumento dili sab kini dawaton sa BIR alang sa imong pagbayad sa Capital Gains Tax og Documentary Stamp Tax og sa pag-process sa transfer.
Busa mas maayo nga imo gyung sundon ang lagda aron di maapektuhan ang validity sa dokumento. Thank you and God Bless!
Atty. Divine
* * *
Alang sa inyong pangutana, palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.