Kuyaw kaayo ang gihimo sa kapolisan didto sa Manila nga mokalit lang sila pag-adto sa kabalayan sa mga sakop sa media aron kunohay sutaon ang ilang “safety.”
Sayonan ka nga ang ubang polis nga mikalit lang pagbisita sa balay sa mga sakop sa media wa magsul-ob og uniporme, unya sa ilang hawak nagbugol ang armas?
Ang paghimo sa kapolisan niining kinalit nila nga pag-inspection sa balay sa mga sakop sa media, gihimo human gipatay ang usa ka radio broadcaster.
Pwede man nga moadto sila sa opisina sa maong mga sakop sa media ug adto sila didto makigkita. Sa ingon nga paagi, malikayan pa nga kadudahan sila nga mga daotang elemento.
Tungod sa dakong sayop nga gihimo sa kapolisan, si DILG Secretary Benjamin Abalos Jr. nangayo og pasaylo.
Usa sa maayong himoon sa kapolisan mao nga kadtong mga media nga posibleng target sa mga daotang elemento, unya gusto nga makahupot og armas, ila untang tabangan.
Unsaon pagtabang? Kon ang media dunay armas, tabangan nila nga maisyuhan kini og permiso nga makadala sila sa ilang mga armas, dili kay lisud-lisuron hinuon.
Kon legitimate nga media, kon dunay programa sa radyo ug lindog sa mga iladong newspaper, kana basehanan na nga hatagan og Permit to Carry Firearms Outside of Residence kon kompleto ang ilang papeles.
Angay unta nga hatagan ang media og benefits, sama sa discount sa bayranan sa PTCFOR nga miabot na og P12,000 para lang sa duha ka tuig.
* * *
Daghan ang nakagusto sa akong gisugyot nga ang mga traffic enforcers dili na magtago-tago, aron lang gyud nga sila makadakop og driver nga dili motuman sa traffic rules.
Kinahanglan nga display sila diha sa mga eskina, ug giyahan ang mga drivers, dili kay magtago-tago sa mga poste. Apan samtang giawhag nato ang mga traffic enforcers niini, awhagon usab nako ang mga motorista nga siguroa nga hitsas sa mga accessories ang inyong mga sakyanan.
Timan-i nga kon LTO ang makadakop ninyo nga ang inyong mga sakyanan way kompleto nga mga suga, libo-libo ka pesos ang inyong bayranan nga multa. Labaw na kon expire ang rehistro sa inyong mga sakyanan unya padayon gihapon ninyo kini nga gigamit, kay P12,000 ang multa niana. Motuman lang gyud ta sa balaod.
* * *
Magpasalamat ko ni Apas Barangay Captain Virgil “Jingjing” Cabigon nga gipahatdan mi niya og 12 ka sako nga semento aron magamit sa pag-ayo sa pwerte kalaksot namong karsada sa among dapit.
Kuwang gyud hinoon ni, apan gipasaligan ko nga pun-an ra niya. Kami na lang ang mangita’g paagi para sa bas ug graba, ingon man sa isuhol sa motrabaho. Salamat Kap!