Moabot sa 39 ka mga tawo ang nadakpan sa mga sakop sa National Bureau of Investigation (NBI-7) dihang ilang gironda ang usa ka electronic sabong o online sabong sa Barangay Calajoan lungsod sa Minglanilla niadtong Septyembre 16 ning tuiga.
Gironda sa NBI-7 ang Amenic N’ Calajoan diin gipahigayon ang online sabong. Ang pagpangronda gipasikad kin isa search warrant nga giluwatan ni Judge Grace Fernandez sa Regional Trial Court Branch 19 nga nakabasi sa dakbayan sa Sugbo.
Ang pag pangronda gihimo human kini gimando sa Malakanyang ug sa ulohang buhatan sa NBI.
Nadakpan sa pagpangronda ang tag-iya ug nagpadagan sa online sabong nga sila si Carlos Uy Gothong III alyas Junjun Gothong ug Sergio Lu alyas Sergio Ong o Dongdong Ong ug ang ilang mga kawani sa online sabong nga gilangkoban sa cameraman, wifi maintenance crew, VIP room incharge, bet encoders, IT maintenance personnel.
Ang operasyon sa online sabong walay pagtugot sa Philippine Amusement and Gaming Corporation ug wala usab kini pagtugot sa local nga kagamhanan sa Barangay Calajoan ug lungsod sa Minglanilla.
Kun sakto ang kasayoran nga akong nadawat, ang lungsod sa Minglanilla mihatag matod pa og pagtugot alang sa usa ka buwangan o cockpit bisan og walay buwangan.
Sa ka dugay nan ga operasyon sa online sabong sa Barangay Calajoan sa lungsod sa Minglanilla wala gyoy opisyal sa barangay ug lungsod ang nakabantay ug nakabadlong sa illegal nga sugal? Asa man pod diay ang mga polis sa lungsod ug lalawigan sa Sugbo? Nangatulog sa kalibonan?
Kun gidakop ang online sabong bisan pa og may pagtugot kini sa PAGCOR human gipahunong ni Presidente Rodrigo Roa Duterte tungod sa dili maayong epekto niini sa mga sugarol ug sa ilang pamilya, nganong nagpadayon man sa ilang operasyon ang online sabong ni Gothong ug Ong? Tungod kay kusog kaayo ang hagok sa mga opisyal sa lungsod sa Minglanilla?