Gikondinar sa Archdiocese of Cebu pinaagi sa vicar for social advocacies niini nga si Fr. Nazario Ace Vocales ang gikatahong pagbalda sa dakbayan ug sa Megawide Corporation sa ilang gipahigayong santos nga misa niadtong Lunes atol sa protesta sa mga tindero ug tindera nga apektado sa gihimong demolisyon diha sa Carbon Market.
Sa iyang pamahayag, giawhag ni Vocales ang kagamhanan nga silotan ang mga kawani nga wala mo respito sa gihimo nga misa.
Salikwaot nga midemanda si Father Vocales og respito apan siya mismo wala magtamod niini.
Kun respito ang hisgutan, isip tinugyanan sa simbahan angayang siya mismo maoy unang nagtamod niini.
Ang Carbon usa ka merkado ug dili maoy tukmang dapit sa pagpahigayon og misa. Dili ba duna may lagda ang simbahan nga nagdili sa pagpahigayon og santos nga misa sa gawas?
Ang problema ni Fr. Vocales mao nga iyang gigamit ang simbahan aron pagkonsintir sa mga suberbiyo nga mga vendors.
Naghisgot naman lang siya'g respito, nganong lisud man alang niya nga irespito ang kamandoan sa dakbayan nga pabalhinon ang mga vendors didto sa interim market aron paghatag og agianan sa proyekto?
Nakalimot ang pari nga samtang katungod sa mga vendors ang pagpanginabuhi apan ila sab nga responsibilidad ang pagsunod sa lagda nga buot ipatuman sa kagamhanan.
Prebilihiyo ra ang gihatag nila sa gobyerno pag-akupar sa luna diha sa Carbon busa dili mahimong sila maoy magbuot unsay kalamboan nga gustong ipatuman sa dakbayan.
Ug inay motabang sa pagpasabot sa mga vendors ug moaghat nila nga mosunod ug mobalhin sa bag-ong dapit nga gihatag nila aron makapadayon sa pagpanginabuhi, gikonsintir na hinuon ni Fr. Vocales ang ilang pagsubisubi.
Busa kun duna may angayang kondinahon sa nahitabo niadtong Lunes, dili ang mga sakop sa market operations division nga mihimo sa demolition kun dili ang mga tawong konsintidor.