Dugay na gyud nga pangandoy sa Basic Ecclesial Communities ning akong parokya nga makabaton gyud og sakyanan nga mahimong kakargahan sa lungon sa motaliwang igsuon labina gyud tong mga kaigsuonang parokyano sa bukirang bahin. Lisud man gyud rong panahona.
Maayo na lang gani kay dunay mga manggihatagon usab nga mopaambit sa ilang mga sakyanan labina gyud kun dunay lubong. Mao nga nakahukom na lang gyud ko kuyog sa mga kaubanan nga mopalit na lang gyud og sakyanan, dili para nako kondili alang sa parokya usab. Busa salamat sa mga donors makuha na gyud ang maong sakyanan. Sa pagtagik nako niini giproseso pa ang mga papeles ingon man giandam ko usab ang mga bayranan. Ang lungon dunay kasakyan na gyud.
Ning nagkaguwang na ang akong panuigon duna koy naamgohan. Kini naglangkob ning mosunod:
1. Una, haduol na ang katapusan. Ug kay haduol naman kini angayan lamang nga mangandam.
2. Ikaduha, ang tema sa kamatayon mao man ang maayong himoong tema sa inadlaw nga kinabuhi. Kini tungod kay ang paghunahuna nga dunay ugma mamahimong usa ka dakong babag sa tawhanong paglampos. Kun unsay mahimo nato karong adlawa dili man maayo nga atong paugmaan.
3. Ang lungon pahinumdom sa kamatayon, ang sakyanan pahinumdom sa atong panaw. Sa panahon nga nagpnaw sa dakong kalisdanan ang mga parokyano kuyog kanila ang parokya. Suliran nato ning tanan, busa angayan lamang nga atong tambayayongan.
Balik sa akong cell phone. Akong gipatan-aw sa technician sa pamasin nga kini mabuhi pa. Ug tuod man, nabuhi gyud kini ug napuslan pa. hinuon nakapalit og lain nga unit. Maayo hinuon aron mas daghan pa ang magamit segun sa panginahanglan og tawag sa panahon. Sa laktod kun dili pa gyud nimo panahon nga mahanaw nan, mamahimong magpabilin kang mapuslanon hangtud moabot kanang maong panahona nga dili na gyud mahimo nimo ang tanan.