Sila ang mga senador

Giproklamar kagahapong adlawa ang mga bag-ong senador nga napili niadtong Mayo 9, 2022 nga piniliay. Ang mga giproklamar nga senador mao sila si Ruben Padilla, Loren Legarda, Raffy Tulfo, Sherwin Gatchalian, Chiz Escudero, Mark Villar, Alan Peter Cayetano, Migz Zubiri, Joel Villanueva, JV Ejercito, Risa Hontiveros ug Jinggoy Estrada.

Kining 12 ka mga Senador ang mokompleto sa nahabiling mga senador nga napili niadtong Mayo 13, 2019 nga piniliay kansang termino unya pa mapopos sa tuig 2025. Ang nahabilin nga Senador mao sila si Cynthia Villar, Grace Poe, Bong Go, Pia Cayetano, Ronald Dela Rosa, Sonny Angara, Lito Lapid, Imee Marcos, Francis Tolentino, Koko Pimentel, Bong Revilla ug Nancy Binay.

Ning 24 ka mga senador, upat kanila mga artista nga sila si Lito Lapid, Bong Revilla, Ruben Padilla ug Jinggoy Estrada. Tulo kanila mga sakop sa media nga sila si Loren Legarda, Raffy Tulfo ug Risa Hontiveros. Unom kanila gikan sa tulo ka pamilya nga sila si Cynthia Villar (inahan) ug Mark Villar (anak), managsoon nga sila si Pia Cayetano ug Alan Peter Cayetano ug magsoon sa amahan nga sila si Jinggoy Estrada ug JV Ejercito.

Lima kanila mga abogado nga sila si Koko Pimentel, Sonny Angara, Francis Tolentino, Alan Peter Cayetano ug Chiz Escudero, usa ang kanhi heneral sa kapolisan nga si Ronald “Bato” Dela Rosa ug upat ang mga negosyante nga sila si Migz Zubiri, Bong Go, Cynthia Villar ug Mark Villar.

Mao ni sila ang mga senador nga gipili sa katawhang Pilipinhon; 4 ka artista, 3 ka mga sakop sa media, 6 nga gikan sa tulo ka pamilya, 5 ka mga abogado, 1 ka kanhi heneral sa kapolisan ug 4 ka magpapatigayon.

Ang Senado giingon nga bansayanan sa mga umaabot nga presidente ug bise presidente sa nasud maong gikinahanglan nga taas ug lapad ang ilang panglantaw kun ikomparar sa mga sakop sa Ubos Balay Balauranan.

Show comments