Sama sa kasagaran nato, si Atty. Ruben Carranza, lumad nga Sugbuanon nga tua na magbase sa New York, gihilasan sab sa reklamo ni Ferdinand Marcos Jr. nga sa niaging 30 ka tuig gisigehan lang siya og pangutana sa mga pasangil sa ilegal nga katigayonan sa ilang pamilya, maong nagbalikbalik lang sab ang iyang tubag nga sayop ang mga pasangil ug way bisan usa nga napamatud-an nga napamatud-an sa korte.
Pero lahi nato, si Carranza may direktang kasinatian, gani naka-iskor og daghang kadaogan, sa pagbawi sa mga kinawat sa mga Marcos.
* * *
Isip komisyonado sa Presidential Commission on Good Government (PCCG) ubos sa ligdong, takos ug isog nga liderato ni anhing Haydee Yorac, si Carranza suhito sa labing komplikado nga mga detalye giunsa nila pagtultol ang gitagoan nga katigayonan sa mga Marcos, paghipos ug pagpalig-on sa mga ebidensiya ug pagsakmit sa kinawat nga mga kuwarta ug kabtangan.
Maong si Carranza may sukaranan sa pagdeklarar nga dakong bakak ang pangangkon ni Marcos Jr. nga way laing nahitabo sa niaging tulo na ka dekada gawas sa balikbalik nga mga pangutana ug mga tubag.
* * *
Gilista ni Carranza ang upat ka higayon nga napilde ang mga Marcos di lang sa mga pangutana ug tubag kon dili sa mga kaso sa korte:
1997: Gihukman sa Korte Suprema ang mga Marcos nga utangan og P23 bilyones sa estate tax sa pagkamatay ni Ferdinand Marcos Sr. ug pagbalhin sa pagpanag-iya sa iyang katigayonan ngadto sa asawang si Imelda ug mga anak nga silang Marcos Jr., Imee ug Irene (wa nila bayri ang buhis maong niburot ngadto sa P203 bilyones sa kataposang paningil sa Bureau of Internal Revenue niadtong Disyembre sa niaging tuig);
2003: Gihukman sa Korte Suprema nga ang legal nga katigayonan nga gideklarar sa magtiayong Ferdinand ug Imelda Marcos gikan sa 1965 ngadto sa 1986 nikabat lang og P16 milyones ug busa kinawat ang tanang sobra nilang kuwarta ug kabtangan;
2012: Gihukman sa Korte Suprema nga ang tanang alahas ug mahalon nga paintings sa mga Marcos kinawat sab; ug
2014: Gihukman sa Korte Suprema nga ang $40 milyones (P2.1 bilyones) nga Arelma account nga gitagoan ni Marcos Jr. sa New York kinawat sab.
* * *