Wa kinahanglana ang necklace air purifiers sa mga sakyanang pamasahero sa Sugbo nga gipaablihan nang mga bintana. Mao ni sulti sa usa ka Sugbuanong espesyalista sa infectious diseases nga nihangyo nga di nganlan kay tingalig ikiha sa pagsukwahi sa harang gangis sa Kapitolyo.
Matud niya mapuslan lang ang air purifiers sa sirado nga mga kuwarto. Pero gamay ra ang proteksiyon nga mahatag sa magsul-ob. Matod niya 10% ra sa mga kagaw ang masagang sa air purifiers. Mas epektibo gihapon ang mas baratong face mask nga makahatag og 95% nga proteksiyon.
* * *
Sa pikas nga bahin, duna siyay pasidaan sa lokal nga mga opisyal ug pribadong mga kompaniya nga namugos na sa ilang mga trabahante, apil nang mga drayber ug konduktor sa mga sakyanang pamasahero sa probinsiya, sa pagpamalit sa air purifiers nga gipamaligya sa mga tindahan sa Sugbo ug online stores:
- Samtang way ebidensiya nga makasagang sila sa SARS-CoV-2, ang kagaw sa Covid-19, ug sa bag-ong variants apil nang Delta ug Lambda, suma sa giklaro sa Department of Health (DOH), abunda ang mga timaan nga makahulga sila sa kahimsog sa magsul-ob.
* * *
Mangahas ko og tinamban sa iyang pagpasabot:
- Ang ions nga ibuga sa air purifiers, nga mopilit ug modala sa mga kagaw sa palibot ngadto sa kinadul-an nga bungbong, makamugna og ozone nga kon masobrahan makadaut sa baga;
- Ang interaction sa ions uban pahumot sa magsul-ob makahimo og makadaut nga mga kemikal sama sa formaldehyde; ug
- Kay gikuwentas mang air purifiers ang kagaw nga nipilit sa ions di na madala sa bungbong kay mas duol ang sapot, liog ug nawong sa magsul-ob.
* * *
Sa ato pa, ang air purifiers di diay anting-ating sa liog kon dili seryoso nga hulga sa kahimsog:
- Ang gamayng bahin sa mga kagaw ug hugaw nga masagang (kay ang 90% masuyop man gihapon sa magsul-ob) di mawagtang, igo lang mopilit sa kinadul-ang surfaces ug magpabiling hulga nga masingo kon molutaw pagbalik sa hangin;
- Ang formaldehyde makapreserbar sa mga patay’ng lawas pero wa igdungog nga makapabaskog sa mga buhi; ug
- Ang mga ganahang mosul-ob nakadugang sa buling sa ilang sapot, liog ug nawong (sa way paghisgot sa ilang tanlag kon may komisyon sa halin).
* * *