Gimando sa siyudad sa Sugbu nga pasirad-an ang Plaza Independencia nunot sa nigawas nga mga hulagway sa daghang mga tawo nga naglakip sa mga senior citizens, mga bata, ug mga hamtong nga nagtapuktapok ug wala na mosunod sa social distancing subay sa minimum health standards.
Makadismaya kaayo nga nasayod man unta ang mga ginikanan, mga hamtong nga wala pa gihapon molurang ang hulga sa pandemiya sa Covid-19.
Niadtong adlaw nga Domingo daw walay pandemic tungod kay daghan kaayong mga tawo nga nagtapoktapok diha sa maong plaza. Walay nahimo ang mga pribadong gwardiya nga gipabantay?
Sa maong plaza sab nahimutang ang makasaysayanong Fort San Pedro nga gitukod pa sa panahon sa mga Katsila. Apan naa sab duol sa maong plaza ang Waterfront Police Station.
Apan walay nakabadlong sa mga tawo bisan mga polis sa maong presinto. Makaalarma kini tungod kay karong panahona nagsige og saka ang mga kaso sa Covid-19 dinhi sa siyudad. Gani anang adlaw nga Sabado, 308 ka mga bag-ong kaso ang natala.
Nganong dili man gyud mosanong ang mga tawo sa gobiyerno nga unta para man sab kini sa ilang kaluwasan ilabi na sa ilang mga anak. Karon naghuot na sab ang mga tambalanan, asa man dad-on unya kung dunay masakit nila?
Kung ang ilang rason gilaay na sila sa balay kinahanglan gyud ba nga sa lugar nga sama sa Plaza Independencia sila mangadto? Sayod man silang daghang modugok nga mga tawo ug naa pay daghang kaso sa Covid-19.
Karon gikinahanglan nang magestrikto ang siyudad, gawas sa pagpasira sa plaza ug uban plazas ug suroyanan sa siyudad, gidili na sab og balik ang pag-inom sa mga pangpublikong dapit ug sayuhon na sab ang pagpatuman sa curfew.
Gawas pa niini, gitun-an na sab og balik ang posibilidad nga ibalik na sab ang estriktong pagpatuman sa one-entrance ug one-exit policy sa Carbon Public Market.
Unsa pa may laing gusto sa publiko? Ipahunong nasab ang biyahe sa mga pasaheroan, pasirad-an ang mga malls, sirad-an ang ubang mga establisamento, idili nasab ang mga misa ug relihiyosong kalihokan?
Daghan na sab mawad-an ani og trabaho ug magsalig og ayuda.