Hulyo 4, 2021: Ikanapulog-upat nga Domingo sulod sa tuig
Mga Pagbasa: Ez. 2;2-5/Sal. 123/2 Cor. 12;7-10/Mk. 6;1-6
Dili ikalimod nga bisan asa anaa gyud ang bigotry kon bias. Kini tungod kay kita mahimong mosud-ong sa mga butang o reyalidad.
Ang maong kagikanan maoy nidumala kanato sa paghukom og bisan unsa o bisan kinsa segun sa panahon ug kahigayonan diin kita nahisugamak. Mao usab kini ang gidangatan sa atong Ginoo.
Ang atong Ginoo sa kapasikaran nga anak lang siya sa panday ug wala makataak og mas taas nga edukasyon. Ang maong bias maoy nakapakgang kaniya mismo sa paghimo og milagro didtong dapita. Kini tungod kay kuwang man sila sa pagtuo.
Sa atong kinabuhi anaa ang mga tawo nga mo reject kanato. Mo-reject sila nato tungod kay sila nakamenos nato. Nakamenos sila tungod kay taas ra ang ilang panlantaw sa ilang kaugalingon.
Kon himoon na nimong sukaranan ang imong kaugalingon sa paagi nga imong gilantaw ang imong isigkaingon nan, malisod alang nimo ang pagsabot ug pagdawat sa bili sa imong isig kaingon.
Unsay angayan natong buhaton?
1. Una, angkona nga sama sa uban ikaw dunay kahuyangan ug busa dili makatarunganon nga ikaw magbiay biay kanila.
2. Ikaduha, aron molambo ang matag relasyon bisan kun diin nga natad, mahinungdanon kaayo nga sud-ongon nimo ang imong isigkaingon ginamit ang sukaranan sa kalumo ug gugma.
3. Ikatulo, kinsa ka man nga mohukom?
4. Ikaupat, ang Dios mahimong molihok bisan pa diha sa mga yanong panghitabo ug mga tawo.
5. Ikalima, ang kamapahitas-on maoy dakong babag kun nganong dili makasulod ang Dios sa atong kinabuhi. Walay mawala diha sa pagpaubos.