Nahurothurot na sa pagbakuna ang mga frontliners sama sa mga medical workers ug ilang mga kaabag. Nabakunahan na usab ang mga senior citizens. Magsunod na kanila ang kinabag-an sa katawhan nga gikinahanglan nga mabakunahan aron makab-ot sa Pilipinas ang herd immunity o pagkaputol sa tinakdanay. Apan mahimo lamang kini kun mabakonahan na ang 70 milyones sa 110 milyones ka mga Pinoy.
Mao kini ang hinungdan sa pagpaningkamot sa gobiyerno nga makapalit og daghang bakuna gikan sa nagkalainlain nga mga drug manufacturer sa kalibotan
Apan daghan nang kaso nga nahitabo diin ang mga nakompletona sa bakona nagpositibo gihapon sa mananakod nga kagaw sa coronavirus disease o COVID-19.
Sa milabay nga buwan duha ka mga Overeas Filipino Workers (OFW) nga kompleto na nga nabakunahan didto sa United Arab Emirates (UAE) ang nagpositibo gihapon sa COVID-19 dihang nauli kini sa nasud. Ang usa kanila taga dakbayan sa Mandaue samtang ang laing usa taga didto sa kaulohan.
Tungod niini subsob ang pahimangno sa mga doktor sa gobiyerno ug mga haniti sa medisina ngadto sa mga tawo nga nabakunahan na sa dili gihapon sa pagpatara sa COVID-19. Gikinahanglan gihapon nila ang pagsulob og facemask, face shield ug sa kanunay nga pagtamod sa social distancing.
Kun mao kini, unsa ra man diay ang benepisyo nga mahatag sa bakona ngadto sa mga nabakonahan na? Kinsa ra man diay ang nakabenipisyo sa COVID-19?
Kun matakboyan man lang diay gihapon sa COVID-19 ang mga nabakunahan na, nagusik-usik lamang diay ang atong gobiyerno og binilyon nga salapi nga gipalit og bakuna nga dili makapanalipod nato sa hingpit sa COVID-19.
Si Doktor Rogene Solante nga usa ka batid sa medisina miingon nga ang mapanalipdan lamang sa bakuna mao ang severe symptoms - nga dili mamatay ang ma-COVID. Dili mamatay pero ma-COVID gihapon.
Kun may nakabenipisyo man sa bakuna dili diay ang mga nabakunahan kun dili ang mga nagbaligya og bakuna ug posible pod nga nakabenipisyo sa bakona ang nagpalit niini.