Disyembre 20, 2020: Ikaupat nga Domingo sulod sa Adbiyento
Mga Pagbasa: 2 Sam. 7;1-5; 12-16/Sal. 89/Rom. 16;25-27/Lk. 1;26-38
Kini ang nalitok nga mga pulong ni Maria sa dihang giingnan siya ni Arkanghel Gabriel nga mamahimo siyang inahan sa Mesiyas. Si Maria tingali angayan lamang nga bation gyud og katingala ingon man kahingawa ning maong hitaboa kinit ungod kay sinayoran siya ug dili maayo sa usa ka babaye nga magmabdos niadtong mga higayona kay mahimong bugti niini mao man mismo ang iyang kamatayon. Kay ang mga babaye nga masakpang mabdos apan dili minyo ang pagasilotan gayud sa kamatayon pinaagi sa pagbato kay mao man kini ang ilang balaod kaniadto. Nangita lamang si Maria sa logical basis sa maong mensahe sanglit sayud man siya dako uyamot nga impossibility nga mamahimong mabdos apan wala kahilabti og lalaki. Usa kini ka pag-defy sa naandang kinaiya nga mamabdos gyud ang babaye kun masudlan og binhi nga gikan sa lalaki. Apan ang gisabak ni Maria dili iya sa tawo kondili iya sa Dios. Mao nga pagatawgon og Emmanel ang Dios ania uban kanato.
Dili madugay saulogon na nato ang Pasko sa pagkatawo sa atong Ginoo. Tukmang higayon kini ingon sama ni Maria nga mitipig kaniya sa iyang sabakan kit apud unta motipig kaniya sulod mismo sa atong kasingkasing. Kay diha lamang sa pagtipig kaniya sulod sa atong kasingkasing mamahimong mas sayon ug mas makahuloganon nga sa atong pagtagamtam sa kaayong Diosnon ato usab paambiton ang uban. Unsa man angayan natong himoon?
1. Pangutana. Kay dha lamang sa pagpangutana masayod kita. Si Maria igo lang nangutana kun unsaon pagkahitabo nga siya momabdos ug si Arkanghel Gabriel ang nisugilon usab kaniya nga ang Espiritu Santo mokunsad kang Maria.
2. Pagtuo. Aron mamahimong mas masabtan ang bisan unsang dunay kalambigitan sa atong pagtuo kinahanglan nga ato kining tuohan. Kay diha sa naghinobrang duha duha malisod ang pagkat-on sa kamatuoran kay bisan ang kamatuoran dili man nato tuohan.
3. Pagtuman. Diha sa higayon nga kita makasabot ug makatugkad nan, dili na kaayo malisud ang pagtuman sa bisan unsa nga gilatid sa kahitas-an.
Ang Fiat ni Maria sa iyang pag-ingon: “Matuman dinhi kanako sumala sa imong gisulti” usa naman ka dakong hagit sa matag usa kanato nga mamahimong mga masinugtanon sa kabubut-ong Diosnon taliwala sa daghang mga pagsulay ug mga risgo. Kini naglangkob sa:
1. Pagkamasinugtanon diha sa pagtuman sa balaod sa gugma nisimba kita tungod kay atong gihigugma ang atong gisimba. Nibuhat kita og maayo tungod kay ang pagbuhat og maayo alang sa uban usa man ka konkretong pagpadayag sa atong gugma sa atong isigkaingon.
2. Ang pagkamasinugtanon dili lang ngadto sa Dios kondili usab sa atong mga pamunoan. Hinuon malisud usahay ang pagsunod kun kita mismo kumbinsido nga wala maghimo sa ilang tagasa tagsa ka mga assignment ang nakapabugnaw man kanato.
3. Ang pagkamasinugtanon maoy nidugtong kanato sa kinatibuk-ang liyok sa uniberso ug nahimo kitang kabahin sa kinatibuk-ang lihok sa balaod nga maoy nidumala sa tanan apil na ang atong relasyon.