Nindot gyud untang mohatag og pamalandong sa matag adlaw nga Misa apan dunay mga higayon nga mas maayo pa nga mohunong lang una og wali aron sa ingon mahatagan og igong panahon ang matag tawo nga makapamalandong sa Diosnong Pulong.
Hinuon Dominggo raman gyud ug sa mga Piyestang Iglilihi kita mamahimong obligado nga mowali.
Ingon ana gyud ang kamandoan sa Liturhiya kay usahay tungod sa naghinubrang tagawtaw diha sa pulpito ang tanan nahimong walay hinungdan. Kay imbis si Kristo ang bida ang kaugalingon naman hinuon ang gibida.
Pun-an pa sa mga tawo nga kanunay lang nangita og sipyat aron sa ingon dunay ikasulti ug dunay ikasaway.
Ang tanan kinahanglang likayan pinaagi sa pagkamaigmaton ug pagbutang sa kaugalingon diha sa dapit nga seguro nga bisan gani ang imong anino dili makita ni bisan kinsa nga buot mosud-ong sa kadulom niini.
Sa akong pag-inusara nakita ko ang bili sa kahilom. Sa akong pag-inusara nakita ang bili sa pagduda. Sa akong pag-inusara nakita ko ang bili sa paghunahuna lamang sa mga maayong mahitabo sa umaabot ug dili ang bati nga urom sa kagahapon.
Ning panahon karon walay kasaligan bugtong kaugalingon lamang ang angayan nga saligan sanglit ang pagsalig lamang sa kaugalingon mao ray bugtong susi sa paglingkawas sa mga hulga ug pagpanamas tamas.
Ang paghilom ug paghikalimot maoy sukaranan sa pagpadayag nga ang tanan nagasukad lamang sa kinaugalingong hukom.
Ang tanan bunga lamang sa pagpili ang tanan bunga lamang sa kaugalingong desisyon. Ang mahinungdanon wala kay tawo kang kansang dungog imong gitumban. Daghang yawit daghang sayop.
Sa dihang giukab ko ang akong breviaryo buot ko mang ampoon sa paagi nga vocal ang maong mga pag-ampo.
Apan mas maayo na lang tingali nga hilom ko kining yawiton kay aron bugtong diwa ko lamang ang masayud sa kabug-at sa maong pag-ampo. Lisud kaayo ang tanan ning mga panahona karon kay bisan gani sa imong kaugalingon lisud na kaayo ang pagsalig.
Usa ka adlaw niana, si San Francisco de Asis kuyog sa iyang kauban. Gipangutana siya niini kun asa man sila paingon ug si Francisco nitubag nga sila magwali ug magtudlo.
Tuod man niadto sila sa mga dapit ug naghimo sila og mga buhat sa kaluoy. Ang kauban ni Francisco nangutana kun kanus-a sila magsugod sa pagwali. Mitubag ang santos nga ang ilang gihimo nga pagtabang ug pagbuhat og maayo usa naman ka matang sa pagwali.
Panahon na tingali nga hatagan og laing bayhon ang matag dagway sa pagtuo nga nahimong outmoded sa mga mata sa kadaghanan niini.