Puol na kaayo hisgotan ang mga kalamboan sa pagkuyanap sa Coronavirus Disease, mora na ta og nabungol pagpaminaw sa balik-balik nga isyu, apan angay’ng masayran sa atong mga opisyal ang kapait sa kahimtang karon sa ilang mga lumolupyo, ilabi na dinhi sa Dakbayan sa Sugbo.
Nasayran nako nga wa diay ko mag-inusara sa mga makaloluoy tungod sa epekto kabahin sa pagkatap sa Coronavirus Disease. Daghan ang nipahibawo nako sa ilang kalisod. Ang pipila kanila nakadawat og cash aid gikan sa Social Amelioration Program (SAP) apan dugay nga nahurot. Nalipay na unta sila nga nakahinay-hinay nga pagbalik sa ilang trabaho dinhi sa Dakbayan sa Sugbo, apan wa pa gani sila masweldohi, naundang na sab ang ilang trabaho kay nanirado man pagbalik ang ilang gitrabahoan tungod sa pagdeklarar pag-usab og ECQ sa siyudad.
Nakasabot ko sa gibati karon sa gatusan ka lumolupyo dinhi sa Dakbayan sa Sugbo, ug bisan na sa ubang mga dapit. Dili sayon nga kada adlaw nanginahanglan ka og pagkaon, apan way kita nga mosulod aron magamit pagpalit og makaon.
May bugas man unta nga gisaad si Mayor Edgar Labella aron ipanghatag sa mga kabus nga lumolupyo, apan niabot na lang og duha ka buwan, wa pa mahatag kay giyak-an sa mga sakop sa Cebu City Council ang Supplemental Budget nga giduso sa mayor aron adto kuhaon ang kuwarta pagpalit og 150,000 ka sakong bugas.
Nasabtan hinuon nako nga gusto lang siguroon sa mga konsehal nga dili kaalyado sa mayor nga ang P3.3 Billion nga gipangayo ni Labella, gamiton gyud sa tinarong, ug dili sa pagpaburot sa pitaka sa pipila ka mga mapahimuslanon sa higayon.
* * *
Ang nakapaturok gud og pagduda mao man kadtong dukomento gikan sa Cebu City Hall nga ang siyudad namalit og libo-libo ka kinarton nga mga canned goods, sama sa sardinas ug corned beef, unya makita nga ang prisyo nila sa sardinas tag P22.
Ambot ngano man sab tawon nga ang mga sakop sa Bids and Awards Committee (BAC) daw sa ignorante man kunohay sa prisyo sa sardinas? Tag P16 ra man gud ang matag lata sa sardinas, ug dunay P17. Sa ato pa, kon ang kada lata sa sardinas gipalit sa City Hall ug tag P22, dunay ganansya nga P5 kada lata?
Kon ako pa’y mayor, ipa-imbestigar nako ang maong isyu ug silotan nako ang mga responsable niini. Dili ko motoo nga ignorante ang mga sakop sa BAC nga wa masayod sa tinuoray’ng prisyo sa sardinas ug ubang canned goods.
Makadaut kadto sa administrasyon ni Mayor Edgar Labella, nga usa ka buotan apan may pipila lang niya ka sakop nga nakadaot kaniya.