Hunyo 14, 2020: Solemnidad sa Corpus Christi
Mga Pagbasa: Deut. 8;2-3;14b-16a/Sal. 147/1
Cor. 10;16-17/Jn. 6;51-58
Niadtong seminarista pa ako nahimong kabahin sa among Class Plan ang kaon ug inom nga butang. Hinuon dili lang kini mahitungod sa pagkaon ug pag-inom.
Mahitungod kini sa panagsandurotay sa usag usa. Mahitungod kini sa panaghiusa ingon nga mga igsuon sa klase ni San Juan Maria Vianney among patron sa klase.
Akong gikamingawan ang maong panagpundok nga alang kanako malisud na gyud labina ning mga panahona karon tungod kay kada usa duna may kaugalingong concern sa parokya.
Sa atong pagsaulog karon sa Corpus Christi, gipahinumdoman kita nga ang pagkaon nahimong kabahin sa atong kinabuhi. Kabahin kini sa atong survival.
Kabahin kini sa atong pagpuyo ingon nga mga tawong malambigiton. Ang atong Ginoo sa dihang iyang gitukod ang Sagrada Eyukaristiya, dunay dakong tinguha sa paghimo ning maong rito ug sakramento ingon nga kahimanan sa pagpalambo sa relasyon tali sa Dios ug kanatong mga tawo.
Dugang pa, ang maong sakramento nagpasabot man sa atong kinabuhi ingon nga Eyukaristikanhon. Human kita mapikas kita ipaambit sama sa nahitabo sa atong Ginoo.
Ang iyang kinabuhi kun buot hunahunaon kinabuhi sa sakripisyo apan bisan pa niini nahimo siyang kinabuhi nga mapasalamaton alang sa uban. Ingon ana pud unta kita.
Mao bitaw nga ang maong tinguha nato sa pagpasalamat atong gipadayag diha sa atong mga intensiyon diha sa mga pamisa dayon ang maong kasauloganatong gihimong dugtongon diha sa atong pagsaulog niini diha sa mga salo salo kuyog sa atong mga higala ug mga sakop sa pamilya.
Kay alang kanato dunay dakong kalambigitan ang gikan sa Misa ngadto na sa Lamesa kun Talad Kan-anan!
Ning panahon sa pandemic, angay gihapon kitang magpasalamat kay hangtod karon buhi pa kita.
Apan dili kini ang sukaranan nga makaingon kita nga mas maayo pa kita kaysa uban. Apan hinunoa ang maong pagpasalamat himoon natong mas konkreto diha sa paghimo og maayo ug sa paghatag sa uban nga mas nagkinahanglan pa kay kanato.
Sa dihang gipangutana ko kun nganong nitabang ko sa uban, ako silang giingnan nga igo ra kong nibayad sa akong utang sa ubang tawo nga nagpaluyo sa akong kalamposan.