Karong duna nay gitawag og new normal tungod sa Wuhan virus pandemic, gustohon man o dili sa katawhan kinahanglan nilang mosunod dili lang tungod kay makalapas sila unya sa mga bag-ong umolong mga balaod ug ordinansa kondili agi na sab og maayong pamatasan.
Kun kaniadto ang mga tawo dili igsapayan ang mosagol sa daghang mga tawo, karon dili na kini mabalik pa. Haw-ang na sab ang paminaw sa tawo kun mogawas sa ilang panimalay nga way facemask.
Gawas niini, duna na gyuy dakong kausaban sa transportasyon tungod sa social distancing, dili na madinutdotay ang mga pasahero apan mas mahal na gyud ang pletihan. Aning mga panahona siguradong daghang mga tawo ang mamalit og bisekleta aron ilang kasakyan sa ilang inadlaw-adlaw nga mga lakaw.
Ang mga tawo man gud siguradong magpanagana na pagsakay sa mga pasaheroan tungod aning COVID-19.
Usa na niini ang mga estudyante kansang mga ginikanan pabiling nabalaka para sa ilang mga anak apan dili gustong masakripisyo ang pagtungha sa ilang mga bata tungod lang sa virus.
Maayo kini nga alternatibong transportasyon diin daghan ang benepisyong makuha ang tawo.
Maayong panglawas tungod kay maehersisyo na kanunay ang pagbisekleta, dili na kinahanglang mogasto pa para sa pletihan ug labaw sa tanan makaayo kini sa kalikopan tungod momenus ang polusyon.
Apan kinahanglang pangandaman na kining daan sa mga lokal nga mga kagamhanan pinaagi sa pagpanday og mga ordinansahon alang sa kaluwasan ug proteksyon niadtong mga bikers diha sa kadalanan.
Kinahanglan sab nga suportahan nila kini og imprastraktura sama sa paggahin og bike lanes sa mga karsada, estriktong pagpatuman sa speed limits sa mga kadalanan sud sa siyudad aron luwas ang mga maglakaw ug mga magbisekleta.
Pagmando sa tanang establisamento sa paggahin gyud og bike racks aron kaparkingan sa ilang mga empleyado ug mga kustomer nga magbisekleta.
Samtang wala pa makabuylo kining “new normal” mas maayong hinayhinayan na sa mga konsehal sa mga LGUs ang pagpanday aning mga gikinahanglang ordinansa ug di na huwatong duna nay problema ayha pa mangita og solusyon.