Kay wa pa may guidelines ang Department of Health (DOH) kon unsaon pagpahigayon ang Strategic Rapid Covid Testing aron pag-ila kon kinsa ang mga dunay Coronavirus Disease, duna ko’y sugyot.
Ang Strategic Rapid Covid Testing ipahigayon sa tanang barangay, apan mas labing maayo nga adto kini sagad himoa sa mga dapit nga dunay daghang natakboyan og Coronavirus Disease.
Mahal ang mga Covid testing kits ug maisip nga pag-usik-usik lang sa kuwarta sa kagamhanan kon bisan didto sa mga mingaw kaayo nga mga barangay sa bukid, pugson ang mga tawo pagpa-test.
Sama kanako nga ania ra gyud sa balay, nia na gani ko nag-broadcast sa radyo gamit ang akong kaugalingong studio/announcers booth, unya kon apilon pa ko sa pag-test maisip na nga usik sa kuwarta sa gobiyerno.
Pero dinhi sa Dakbayan sa Sugbo, gibutyag ni Mayor Edgar Labella nga ang mga “head of families” mao ra ang i-test, ug dili ang tanan nga sakop sa pamilya.
Gitataw usab ni Mayor Labella nga dili sab ang tanang “head of families” ang i-Covid test. Kadtong mga barangay nga wa gyuy mapositibo sa ipahigayong Strategic Rapid Covid Testing, makabentaha kay sayon ra sila nga makabalik sa ilang mga trabaho.
* * *
Ang Malacañang mimando nga ang Department of Social Welfare and Development DSWD) nga maoy tugyanan sa pagpanghatag sa gitawag og Social Amelioration Program nga tag P6,000 ngadto sa P8,000 kada beneficiary.
Kay ang DSWD kuwang man og mga kawani, mi-tap sila sa mga opisyal sa barangay. Apan subo lang kay dunay mga kawani sa barangay nga wa magtarong sa ilang trabaho.
Ang gitahas kanila mao nga moadto gyud sila sa kabalayan aron makita nila ang kahimtang sa mga mo-apply sa SAP, unya ma-interview ang maong mga applicant.
Apan wa nila kini himoa ug didto ra sila sa dapit nga sayon ra, ug gitugotan nila ang katawhan nga hugopan sila ug modawat ra sila sa mga ngalan nga ihatag kanila.
Sus, naapil sa lista bisan ang tres-anyos nga bata. Dunay ginikanan nga naapil ug ang anak nga bayongbayong nga ipon ra niyag puyo naa sab sa lista, may tawo nga nagtrabaho sa gobiyerno ug tua gani sa probinsya, naapil sa lista bisan og wa kini personal nga mi-apply.
Karon, motuo na ko nga wa gyud mamaayo sa pag-ila kinsa ang angay’ng makadawat tungod sa kaligoy sa ubang mga kawani sa barangay nga gitahasan pag-abag sa mga opisyal sa DSWD.
Tambag nako sa mga kapitan sa barangay nga magmata na unta sila kay gipahibawo ra ba nga ikiha kadtong mga opisyal nga miapil sa mga “unqualified” aron sila makadawat og tabang salapi sa gobiyerno.