Wa tingali bisan usa sa nahatagan sa duha ka pahina nga porma, nga gitawag sa Department of Social Welfare and Development (DSWD) nga social amelioration cards (SAC), nga motug-an nga haruhay sila. Bisan ang adunahang mga alyado sa lokal nga mga opisyal, nga nagdahom nga silay magbuot kinsay matabangan, mahimong mangangkon nga wa na silay kaon.
Hinaot nga may katakos ug panahon ang DSWD pagsusi sa katinuod sa SAC. Nabalaka hinuon kong igo lang nilang susihon kinsa sa mga ngan nga iduso sa mga politiko ang nadoble sa ilang kaugalingong Listahanan.
* * *
Ang Listahanan sa DSWD, nga gitawag og National Household Targeting System for Poverty Reduction (NHTS-PR), gilusad niadtong 2009 aron pagtul-id sa karaan ug taghap-taghap nga sistema sa pag-apud-apod sa mga hinabang atol sa mga katalagman ug ubang dinaliang panginahanglan. Ang naandan nga pagsalig lang sa paghukom sa lokal nga mga opisyal kinsay tabangan ug pangangkon sa mga molupyo nga sila ang labing tabanganan nisangpot sa duha ka salawayon nga anomaliya:
Leakage: Nahatagan og hinabang ang mga molupyo nga wa magkalisudlisod; ug
Deprivation: Nalaktawan ang labing kabos nga mga molupyo.
* * *
Apan ang paghimo sa Listahanan, nga gipasalig nga makiangayon kay luwas na sa pagpanghilabot sa politikanhong mga interes, nahiagom sa daghang pagsuway. Gibutyag sa enumerators sa DSWD ang pipila ka maniobra:
Ang lokal nga mga opisyal nga gipananghiran sa ilang pagsud sa mga barangay nipaandam nang daan sa ilang politikanhong mga dumadapig; maong
Ang napasidan-ang mga molupyo nidalidali pagpapas sa mga timaan sa ilang kaharuhay (nabantayan hinuon sa enumerators ang lakra sa gitagoang refrigerators ug mga sakyanan).
* * *
Ang Listahanan sa DSWD di sab hingpit. Ang kataposang house-to-house survey sa DSWD nahimo pila na ka tuig ang nilabay. Mahimong wa maapil ang bag-ong mga molupyo ug nadugang nga kabos nga mga pamilya.
Maong gitugyan sa DSWD ngadto sa lokal nga mga opisyal ang paglista sa mga drayber sa habalhabal ug tricycle, sidewalk vendors ug ubang way suholan ug mga benepisyo. Sama rang gibanhaw sa DSWD ang karaang eskandalo nga gusto nilang likayan pinaagi sa Listahanan.
Maong di ikahibung nga nisibaw na ang naandang kalibog ug kaguliyang sa kabaranggayan sa mga dakbayan ug kalungsoran.
* * *