Kon mapaod na ta sa bungbong, kon mahimutang sa kinatumyan sa dan, nga way kahayag ug way paagi sa pag-ikyas, kon bisan ang Ginoo mora og wa maminaw, kinahanglang atong hinumdoman nga wa ta mag-inusara. Nagpasakit si Hesus sa krus alang nako, alang nimo, aron sultihan ta: “Ayaw kahadlok, wa ka mag-inusara. Akong nasinati ang tanan nimong kagul-anan aron nga mas mapaduol ko nimo.”
Karon, atubangan ning kalibotanong hulga sa sakit, atubangan sa daghang gisandigan nga nahugno na, atubangan sa daghang paglaom nga gibudhian, si Hesus nisulti sa usag usa nato: “Kaisog, ablihi ang imong kasingkasing sa akong gugma. Imong mabatyagan ang pag-amuma sa Ginoo nga mopalahutay nimo.”
* * *
Mahimo tang magdumili sa pagbudhi ni Hesus. Nahimugso ta ning kalibotana aron paghigugma niya ug sa atong mga silingan. Ang tanang butang lumalabay, kini ra ang magpabilin. Ang katalagman nga atong nahiagoman nag-awhag nato nga di magpalipat sa mga butang nga di mahinungdanon; pagkaamgo pag-usab nga ang kinabuhi way kapuslanan kon di gamiton pag-alagad sa uban.
Ning balaanong mga adlaw, sa atong mga panimay, mobarug ta atubangan ni Hesus nga gilansang sa krus ug mangayo sa grasya sa pagpuyo aron sa pag-alagad. Hinaot nga mokawhat ta sa mga mas nagkinahanglan. Hinaot nga di na mag-ihap unsay kuwang nato, apan sa kaayuhan nga atong mahimo alang sa uban.
* * *
Ang Amahan, nga nipalahutay ni Hesus sa iyang pagpasakit moagak sab nato sa atong mga paningkamot sa pag-alagad. Paghigugma, pag-ampo, pagpasaylo, pag-atiman sa uban, sa pamilya ug sa katilingban: kining tanan labihan kalisod. Mora ta og nagpas-an sa krus. Apan ang agianan sa pag-alagad madaugon ug makahatag og kinabuhi nga makaluwas nato.
Tan-awa ang tinuod nga mga bayani ning katalagman: di sila bantogan, adunahan ug malampusong mga tawo; hinunoa, sila ang nihatag sa ilang kaugalingon pag-alagad sa uban. Paminawa ang tawag sa pagtahan sa inyong mga kinabuhi. Ayaw kahadlok sa paghatag sa imong kinabuhi sa Ginoo ug sa uban.
Kay ang kinabuhi gasa nga ato lang madawat kon atong ihatag ang atong kaugalingon, ang labing makahuloganong kalipay nanukad sa pagtando sa gugma, nga way bisan gamayng higot. Sama sa gihimo ni Hesus alang nato. (Kabahin sa wali ni Pope Francis sa pagsugod sa Semana Santa.)