Ang balaod nga napasar sa Senado ug gikopya sa House of Representatives ug gipirmahan na ni Presidente Rodrigo Duterte, nga naghatag niya og dugang gahom ug kuwarta pagbadlong sa Covid-19, naglakip sab og daghang sugo.
Nireklamo unta silang House Speaker Alan Peter Cayetano ug kaubanan sa naghinobrang “mga detalye” nga gisukip ug mahimong na-insulto sab ang presidente sa pakapin nga mga sugo unsaon paggasto ang kuwarta ug unsaon pagbadlong ang epidemiya, apan gidawat na lang nila ang bersiyon sa mga senador aron di madugangan ang nalangay nang daan nga pag-atiman sa krisis.
* * *
Gisalikway sa mga senador ang gipangayo sa Malakanyang nga gahom sa hingpit nga pagbanos sa pribadong mga kompaniya.
Gitugotan hinuon ang presidente sa limitado nga takeover nga may tukmang bayad sa pribadong mga ospital aron kapahimutangan sa mga pasyente, pribadong hotels aron mapuy-an sa health workers ug pribadong transportasyon aron masakyan sa frontliners.
Gitangtang sa mga senador ang mga kompaniya sa telepono sa listahan sa mga negosyo nga mahimong banosan sa presidente.
Apan gipuno ang pribadong mga barko aron makargahan sa dinalian nga mga suplay sa pagkaon ug tambal.
* * *
Gitugotan sab sa mga senador ang presidente paggamit sa P275 bilyones nga gahin sa executive department: Ang P200 bilyones itabang sa kabos nga mga pamilya nga naapiki sa Covid-19 ug P75 bilyones alang sa panginahanglan sa mga pasyente ug health workers.
Sa ato pa, di siya kapanghilabot sa buwag nga gahin alang sa Kongreso ug mga hukmanan. Gideklarar ni sa Korte Suprema nga ilegal kay maoy gihimo ni kanhi Presidente Noynoy Aquino sa iyang Disbursement Acceleration Program (DAP).
* * *
Niang pipila sa kapid-an ka sugo ngadto sa presidente:
Paspasang accreditation ug pag-apud-apod sa test kits aron mapahigayon dayong mass testing sa gidudahang mga kaso sa Covid-19;
Abagahon sa PhilHealth ang gasto sa pagtambal sa mga pasyente sa Covid-19 (ang matag matakdang health worker bayran og P100,000 ug ang mamatay hatagan og P1 milyon);
Paghatag og P5,000 ngadto sa P8,000 matag pamilya sa 18 milyones ka kabos nga mga pamilya sa tibuok nasud; ug
Mohatag og kuwentada ang presidente ngadto sa Kongreso giunsa paggasto ang kuwarta matag Lunes sa matag semana.
* * *