Naayo ang nayawaan sa dapit nga ginganlan og Gerasa dapit sa Decapolis gikan sa pagkabiktima niya sa gahom ni Legion. Buot niyang mokuyog apan gipugngan siya sa atong Ginoo ug hinunoa gipabalik na lang siya ngadto sa iyang kaugalingong panimalay.
Mao nga ang maong tawo nisangyaw sa maong kasinatian ngadto sa iyang mga kaigsuonan. Kining maong sanglitanan nipahinumdom kanato nga dili tanang mga nakalingkawas sa bisan unsang krisis o nakasinati og bisan unsang grasya ang kinahanglang mosubay og dalan nga lahi sa gisubay sa kadaghanan.
Kini tungod kay ang pagkaayo gikan sa gahum sa dautan maoy maayong balita ngadto mismo sa kaugalingong panimalay. Ang maayong balita kinahanglang magsukad gyud mismo diha sa atong tugkaran.
Maingon nga ang katilingbanong sala naumol pinaagi sa mga personal ug kinaugalingong pagpakasala mao usab ang kasinatian sa grasya.
Ang personal nga kasinatian sa grasya mahimong atong ipaambit ngadto sa katilingbanong hawanan aron sa ingon atong madasig ang uban pinaagi usab sa atong personal nga kasinatian.
Ang kasinatian sa maong tawo nga gipalingkawas ni Jesus gikan sa gahum sa dautan ang wala pakuyoga kay mas nahimong gamhanan ang iyang pagsaksi kun himoon niya kini sulod mismo sa iyang tugkaran.
Wala siya kuyoga dili tungod kay wala siya kinahanglana kondili tungod kay mas mamahimo siyang imprint kun marka sa gibuhat nga kaayo ni Jesus diin ang gihimong exorcism dili diay arrogant display of divine power kondili pagpadayag sa gugmang Diosnon.
Ang bisan unsang gahum sa kangitngit dili ug dili gyud mamahimong magmadaugon batok sa gahum sa dautan. Kining maong pagmantala nagdasig kanato nga huptan nato ang pagtuo ug kaisog nga bisan unsay mahitabo dili kita pasagdan sa Dios. Anaa siya kanunay nga manalipod kanato gikan sa gahum sa dautan.
Dunay termino nga Secular Institute. Diin nagpundok ang mga layko ingon nga katilingban apan padayon gihapon sila sa ilang naandang buhat ug panginabuhian.
Ang spirituality nga maoy nagbugkos sa ilang kalambigitan ingon nga katilingban. Kining maong sanglitanan nagpahinumdom kanato nga dili na kinahanglanon pa nga usbon nato ang atong naandan o talikdan ang atong panginabuhian aron sa Dios kita makaalagad. Bloom where we are planted ug sa maong sukaranan kita makahimo og lilo sa hawanan sa katilingban.