Gisaway ni Cebu City North District Councilor Joy Augustus Young ang awhag ni Presidente Rodrigo Roa Duterte atol sa iyang pagsaksi sa Sinulog 2020 ngadto sa mga lokal leaders sa Sugbo sa pagkopya sa teknolohiya nga gigamit didto sa Manila pagsulbad sa suliran sa trapik.
Ang konsehal nangutana nganong kopyahon man kuno ang teknolohiya sa Metro Manila nga wala man kini makasulbad sa suliran sa trapik niini.
Gisugyot man gud ni Duterte ang pagtukod og mga skyways ug pagpadagan og mga train. Gipasabot sa presidente nga dili na mahimong palapdan ang kadalanan sa Sugbo. Matud niya nga kay dili lapad ang kadalanan dinhi dili usab kini angay sa Bus Rapid Transit ug nga angayan niini ang train nga magdagan sa taas.
Gidepensahan ni Presidential Assistant for the Visayas Mike Dino si Presidente Duterte ug gisumbalikan si Young nga iyang gihulagway nga sama sa hupas na nga tambal. Ang ideya sa konsehal hupas kuno kay walay epekto sa suliran sa trapik.
Gihatagan na siya ug ang iyang partido og kahigayonan sa pagsulbad sa suliran sa dakbayan sa Sugbo pero unsay nahitabo misamot na hinuon ang suliran sa trapik, baha ug basura.
Kun nagtuo si Young nga mas utokan pa siya sa presidente, aw, magpapili na lamang siya sa pagkamayor. Pero, gipul-an na nila ang mga tawo maong naparot sila niadtong miaging eleksiyon.
Ang mga flyover ug underpass nga gisugyot sa partido ni konsehal Young dili sulbad sa suliran tungod kay ibalhin lamang niini ang suliran sa trapik sa sunod nga eskina.
Sa mga dagkong dakbayan sama sa Sugbo gikinahanglan ang Integrated Intermodal Transport System aron moluag ang trapik.
Gisugyot na kini kaniadto apan gibabagan sa grupo ni Young. Kini ang dugang sumbalik ni Secretary Dino ngadto kang Young.
Kun unsa man ang makaayo sa Sugbo ug mga Sugboanon, ato lang seguro nga suportahan.