Gipahinumdoman ang higanteng mga kompaniya sa ilang mga konsumidor pinaagi sa social media nga exclusive ang Sinulog karong tuiga. Busa kusganon nga niawhag ang netizens nga himuon nga exclusive sa dakbayan sa Sugbo ang cellphone signal shutdown nga ilang gipatuman.
Usa nila nga taga Minglanilla sa habagatang Sugbo nipadayag og kahimangod nganong naapil og kapawong ang ilang signal bisan layo ra sila sa fluvial procession sa Lapu-Lapu, Mandaue ug Cebu City gahapon sa kadlawon. Napawong sang signal sa among mobile phones sa Consolacion sa alas-3 pa lang gahapon sa kadlawon.
* * *
Dihang nisuway og panawag sa among sibyaanan dayong alas-7 gahapon sa buntag, akong nahibaw-an nga pawong ang Globe apan buhi ang Smart. Mao say nasinati sa netizens (way Globe apan dunay Smart ug Sun) sa ubang bahin sa Metro Cebu hangtod sa ikaduhang hugna sa pawong sa alas-12 gahapon sa udto.
Ambot nakakita ba og paagi ang mga inhinyero sa Smart sa paghigpit sa ilang shutdown sa Dakbayan sa Sugbo o mas masinugtanon lang gyod ang Globe sa sugo sa National Telecommunication Commission (NTC) ug Philippine National Police (PNP).
* * *
Ang pait nga kamatuoran mao nga mahimong wa kinahanglana ang lapad nga sakripisyo sa panginabuhi ug patigayon sa mga Sugbuanon ug sa atong mga bisita sa pagkaputol sa sistema sa komunikasyon gahapon ug karong adlawa.
Kay kon imong subayon ang mga sulti sa lokal nga kadagkoan sa kapolisan, way aktuwal nga mga hulga batok sa kahapsay sa Piyesta Senyor apan kay mao na may naandan ila lang gihapon nga gipapawong ang cell sites.
* * *
Ang Police Regional Office sa Central Visayas maoy nisuwat sa NTC aron pag-awhag og cellphone signal shutdown. Human sa pila ka adlaw, nipahibawo ang Cebu City Police Office nga way hulga batok sa Sinulog apan di nila bakwion ang suwat sa NTC aron nga mapatuman dayon kon motumaw ang panginahanglan.
Dihang gipahibawo na sa NTC ang schedule sa signal shutdown, nipasabot ang kapolisan nga ang schedule maoy nahimutang sa ilang suwat apan mahimo pang mausab. Samtang nagtimbang-timbang pang kapolisan may tinuod bang panginahanglan sa signal shutdown, gipawong ang cell sites ug nahikawan sa labing sayon nga paagi sa komunikasyon ang Sugbo.
* * *