Maayo unta og ang mga bag-ong sakop sa Board of Directors sa MCWD nga tinudlo ni Mayor Edgardo Labella, maninguha gyud nga kapangitaan nila og sulbad ang kakuwang sa suplay sa tubig sa Metro Cebu.
Gitudlo ni Mayor Labella ang lima ka bag-ong sakop sa MCWD Board ug si kanhi konsehal Joey Daluz III maoy magsilbe nga chairman.
Tan-awon nato kon unsay labok niining mga tawhana pagsulbad sa problema sa tubig sa kaliboan ka konsumidor sa Metro Cebu.
Usa kanila mao ang akong amigo nga si Atty. Frank Malilong nga sama kanako, maglilindog sa mantalaan.
Kay kaming mga sakop sa media kusog man kaayong mosaway sa mga opisyal nga way maayong lihok sa pagserbisyo sa publiko, lauman nato nga si Malilong motrabaho gyud.
Usa ko sa mga nagbagutbot kay way agas ang among mga gripo sulod sa kapin tulo ka buwan.
Ang rason sa kadagkoan sa MCWD mao nga mikunhod gyud kuno ang suplay sa tubig sa mga tinubdan.
Apan siyaro na man pud og wala na lang gyud nila pangandami nga kada tuig duna man gyuy masinati nato nga huwaw, ug moresulta nga mokunhod ang suplay sa tubig sa ilang mga dam.
Wala gyud makahunahuna ang mga sakop sa MCWD Board nga dugangan ang duha ka dam sa tubig sa Barangay Buhisan ug Jaclupan, Talisay?
Bisan ako makaingon gyud nga palpak sa ilang mga trabaho ang mga kanhing sakop sa MCWD Board nga gipangtangtang ni Labella ug nalipay ko nga sila gipulihan.
Kon makahatag na sila og igong suplay sa tubig ngadto sa kapin 193,000 ka konsumidor sa MCWD, angay usab nila nga himoan og paagi nga mailisan ang mga tayaon ug dunot na nga mga tubo sa tubig.
Wala malilong kanila ni Daluz ug kaubanan sa board nga daghan na kaayo sa katawhan karon, nga wala na moinom og tubig nga direktang gikan sa mga gripo sa MCWD.
Nag-antos kita paggasto sa gamay natong kinitaan aron pagpalit og mga “mineral” water kay nahadlok kita nga kon moinom direkta sa tubig sa MCWD mangasakit kita kay daghan sa mga tubo niini naa na naghumol sa mga kanal.
Buyno atong ubanan si Mayor Labella sa paghatag og dako nga kumpiyansa ug pagsalig nga ang mga bag-ong sakop sa MCWD Board makahatag gyud og sulbad sa problema sa kakuwang og tubig ingon man masiguro ang kalimpyo sa ilang produkto.