Panahon sa katalagman ug nagkinahanglan ang Pilipinas og hinabang daghang mga kanasuran ang walay pagdikidiki nga mopadala og hinabang aron mahatagan og alibyo ang kalisdanang natagamtaman sa mga biktima nga dili kayang mahatag dayon sa gobiyerno.
Angkonon man o dili sa gobiyerno sa Pilipinas, dili niini kayang mahatag dayon ang dinaliang panginahanglan sa mga tawo kun dunay dagkong katalagman sama sa nahitabo niadtong 2013 sa bagyong Yolanda.
Gawas sa Amerika, ang nasud sa Australia dali kaayong mopadala og tabang sa Pilipinas kay giisip nila kitang silingan kay gusto nilang makabarog dayon pagbalik ang mga biktima. Karon ang Australia na sab ang nagkinahanglan nunot sa lapad nga mga sunog sa mga kalasangan didto nga naabot na sa mga kabalayan. Kaliboan ka mga Australiyano ang apektado ug duna nay nangamatay.
Bilyones dolyares nga kantidad sa mga kabalayan, kabtangan, hayopan ug mga pananom ang naabo.
Swerte ang Pilipinas kay bagyo ug linog ra ang kanunay moigo dinhi, apan ang Australia, dunay gitawag og bush fire season, tungod dunay mga buwan sama karon nga taas kaayo ang temperatura didto maong dali ra kaayong moulbo ang sunog. Tungod kay wala’g tuo ang lagpad nga sunog, dili kaapupa ilang mga bombero ug pwersa sa kasundalohan pagpawong niini. Ang Singapore nipadala na sa ilang mga air assets aron motabang, mao sab ang ubang mga kaalyado sa Australia.
Ang Pilipinas usa sa mga kaalyado ug pirmeng benepisaryo sa mga hinabang gikan sa Australia, wala pa may balita kung motabang ba. Maayo lang ta sa dawat?
Usa sa mga rason mao ang kakuwang og mga gamit ug ekipo sa Armed Forces of the Philippines aron mapadala didto. Kung buot isipon dili pag-usik sa pundo kung giapil kanunay sa pagpalit ang mga gamitonon sa Humanitarian Assistance and Disaster Relief (HADR) operations kay agianan sa bagyo ang Pilipinas.
Ang Singapore bisan unsa pa ka gamay ug wala kaayoy mga dagkong kalamidad sama sa Pilipinas, may kapabilidad silang motabang tungod kay ni-invest silang daan ug nangandam sa ingon ining mga hitabo.