Mihirit na usab ang kanhi mayor niining dakbayan sa Sugbo nga si Tomas Osmeña sa iyang paningkamot nga maimbalido gayud ang pagbaligya kaniadto sa pipila ka porsiyon sa South Road Properties nga iyang gialegar nga anomaloso.
Sa niaging mga adlaw gibalita nga mopasaka og kaso si Osmeña batok kang kanhi mayor ug karon Bise Mayor Michael Rama tungod kuno sa pag-aprobar niini sa pagbaligya sa mga luna sa SRP ngadto sa consortium sa SM ug Ayala ug ngadto sa Filinvest Land.
Matud pa sa kampo ni Osmeña nga illegal kuno kadtong maong pagpirma ni Rama – sa dihang mayor pa siya – pagpbaligya sa maong mga luna gumikan kay wala kini pagtugot sa konseho sa dakbayan.
Hagbay na kadtong maong transaction. Gani, sa dihang mibalik si Osmeña pagkamayor, iyang gidiskase ang maong kasabotan tali sa dakbayan ug mga developer samtang padayon ang iyang legal nga pag-asdang batok niini.
Kini bisan pa man nga mipabor na ang korte sa pagbaligya sa maong mga luna ug nga balido ang nakab-ot nga kasabotan tali sa kagamhanan sa siyudad panahon sa administrasyong Rama ug sa mga land developer.
Ambot kun unsa unyay sangpotanan niining bag-ong legal nga lakang ni Osmeña batok sa transaksiyon sa maong mga lote diha sa SRP.
Mosaler ba kaha kini? Ato lamang panid-an ang desisyon sa Ombudsman.
Hinuon daghan ang nagtuo nga panglawgaw gayud kining gibuhat sa kanhi mayor.
Kini gumikan lagi kay ang desisyon sa korte sa mga petisyon sa kampo ni Osmeña pabor man sa transaksiyon sa maong mga lote.
Nagpasabot lamang kini nga wala nay babag ang kaugmaranan sa maong mga luna. Gani nangandam na man ang SM ug Ayala sa alang sa ilang dako ug ambisyosong proyekto nga ilang tukoron.
Bitaw. Hagbay ra unta nga natukod ang proyekto sa maong consortium. Apan gumikan lagi sa duwa sa politika, nikaging ang maong proyekto. Ug klaro nga mismo ang mga molupyo sa dakbayan ang naapektohan niini.