Final na gyud nga ang eleksyon alang sa mga opisyal sa kabarangayan unya na ipahigayon sa tuig 2022. Sa ato pa, malugwayan og subra duha ka tuig ang termino sa mga opisyal sa barangay.
Nindot kaayo ni ngadto sa katawhan kon ang ilang mga opisyal pagka karon dili mga corrupt, unya maayo moserbisyo sa ilang katagilumolupyo.
Apan maisip kini nga dugang pag-antos niadtong mga nagpuyo sa mga barangay nga ligoy ug kurakot ang ilang mga opisyal. Mga opisyal nga hangol og pwesto sa kagamhanan ug tungod niini, mahadlok sila nga mopatuman sa balaud kay mahadlok nga daghan ang masuko kanila.
Sus, daghan ra ba gyud kining matanga sa mga opisyal. Para kanako, kana si Manila Mayor Isko Moreno angay unta nga sundon sa mga opisyal.
Pag-asumier ni Isko sa katungdanan, gilimpyohan dayon niya ang mga aseras nga gigamit na sa personal, ug gibalik kini aron magamit sa publiko.
Dinhi sa ato, kon mosuroy ka, makita nimo nga kadaghanan sa mga opisyal sa kabarangayan nanghinan-aw lang sa mga abuso sa ilang mga lumolupyo. Ang uban gani kay karsada na gyud ang gigamit sa personal, sama diha sa Barangay Carreta.
Mao na nga wala gyud ko mobilib sa mga opisyal diha kay giisip nako nga sila mga hangol kaayo og katungdanan sa kagamhanan mao nga mahadlok sila mopatuman sa balaod kay basin og mapilde inig eleksyon.
Pasayloa ko nga ang Carreta maoy gihimo nako nga ehemplo kay duna man go’y karsada diha nga nagsukad sa General Maxilom Avenue ug molapos unta sa T. Padilla Extension nga lisud na kaagian og sakyayan kay giparkingan og mga motor, awto ug gibutangan og mga tindahan.
Nahinumdom sab ko nga diha sa Barangay Suba, Dakbayan sa Sugbo, may karsada nga nahanaw na kay gipangtukoran og kabalayan. Pero mora’g ang kapitan kaniadto dili pa ang akong amigo nga si Kapitan Jojo Sable, kadto pa tingaling karaang kapitan.
* * *
Diri sa among barangay sa Apas, saludo ko ni Kapitan Virgil “Jingjing” Cabigon kay sa iyang pagkatawo, maila nimo nga wala gyud siya’y tumong nga mangurakot sa kuwarta sa barangay.
Bag-o pa lang, ang Barangay Apas nipalit og tulo ka garbage truck ug nakabarato siya. Abi ninyo og ngano? Iyang giingnan ang supplier nga hatagan siya sa labing ubos nga presyo kay dili siya mangayo og komisyon.
Unya, dunay suod niya nga amigo, mihatag niya og “Elf” nga sakyanan. Iyang gipa-donate sa barangay aron kini magamit bisan og dili na siya ang kapitan. Ingon niana ang mga angay’ng padugayon sa pwesto.
* * *
Atangi diay sa Radio DYLA 909 KHz sugod Enero 2, (alas 8:30 ngadto sa alas 9:30 kada gabii) ang akong programa, Birador!