Dunay mga estudyante nga kanako miduol aron mangutana. Ako pud gitubag ang ilang mga pangutana. Apan sa kaulahian usa kanila ang niangal nga lisud gyud kuno ang ilang pagtungha. Hinuon dili man ikalalis nga lisud kay siyempre buot baya nilang mamahimong accountant sa umaabot.
Apan bisan pa og unsaon nimo og sulti apan dunay uban nga magdumili gyud sa pagdawat niining maong pagtulon-an. Alang nila kinahanglan ang kinabuhi sayon ug lami.
Anhi ta sa lami ug bisan unsang lamian. Daghan nato ang mangita gyud og lamiang pagkaon bisan pa man kun sayud ta nga kini makadugang sa alta presyon.
O buot natong motilaw og bisan unsang tam-is bisan pa man kun kini nagkahulogan og diabetes. Mas daghan nato ang mopili sa lami ug mo sakripisyo na puhon. Mao tingali nga daghan kaayo ang mga teenage pregnancy tungod kay buot man sila sa lami bahala na kun magusbat ang ugma.
Nahimong alien ang sakrispisyo karong panahona. Ngano man kaha? Tungod ba kay sa kalibutan karon uso na kaayo ang bisan unsang instant?
Gani ang mga desisyon usahay sa kadagkoan instant naman labina kun ang ikasabot nila nahiuyon sa ilang lingin nga katarungan.
Bisan asa ug bisan diin nahimong daw sa buot nato ang dali nga mga lakang sa paglambo. Maangkon sa tigpasiugda ang garbo ug pasidungog sa kaalautan sa mga mosunod nga henerasyon.
Ug kun ugaling makahimo ka og mga butang nga angayang pasidunggan unta apan kay wala man mahiuyon sa sukaranan sa kadaghanan mao nga nahimong deviant ang imong binuhatan kay lagi wala man mahiuyon sa kadaghanan. Ning panahon nato karon nahimong daw labad ang ulo sa kanato. Idlas ang katagbawan ug idlas usab ang tinud-anay nga pakigbisog. Dili paigo ang pagpunay lang og tudlo sa doktrinang langitnon kinahanglang puy-an nato kini sa atong kinabuhing tawhanon. Nahimong nartista lamang ang giingon nilang pagsakripisyo panahon sa Semana Santa kun ugaling dili gani kita maantigong mohatag og hustong suholan o praktikal nga hinabang alang sa mga tawong nagkinahanglan. Unsaon na lang kaha nato pagsabot ang langit kun wa gani nato makita ang bili sa mga langtingong pagtulon-an uban sa atong mga kaigsuonan? Di ba nahimong routine na lamang ang tanan?
Daw sa mongislo unta ang akong nawong sa dihang gidapit ko alang sa usa ka birthday sa kapasikaran nga lapok kaayo ang dalan padulong didto ug nga may lain pa akong schedule. Apan sugo sa kaikog akong giadto ang balay nikaon og diyotay dili tungod kay way lami ang pagkaon lamian sila for sure apan tungod sa pangedaron angayan lamang nga magmatngon. Gihagwa ko ang gamay nga bata nga nagsaulog sa iyang adlaw nga natawhan ug dayong biya na unta may gitunol nga sobre ang tagtungod apan ako siyang giingnan nga okay lang gyud kaayo kay after all ang mahinungdanon gihatagan og katumanan ang iyang yanong hangyo nga saluhan sila sa ilang panihapon.