Kini ang gustong masayran sa kadagkoan sa kapolisan ug nadugang karon ang Commission on Human Rights nga nagpakisusi na sa kamatayon sa 10 anyos nga batang lalaki sa lungsod sa Balamban.
Napalgan siya sulod sa kotse sa usa ka fire officer sa naasoy’ng lungsod niadtong adlaw’ng Sabado.
Gidala pa sa tambalanan apan patay na gyud kini tungod sa suffocation. Disgrasya? Aksidente? Walay foul play? murag dili gyud malikayan nga adunay naglimin nga pangutana niining panghitaboa. Posible kunong misulod ang bata sa awto dihang nakabiya na ang tag-iya niini ug na automatic lock ang pultahan. Posibleng dili kahibawo ang 10 anyos nga batang lalaki sa pag-abli maong natanggong siya ug nahutdan og hangin kay basin init kaayo ang panahon.
Ang tanan posible o pamasin nga nahitabo, kinsa ba gud kahay gustong makadisgrasya og kinabuhi ilabi na sa usa ka fire officer kinsa ang tahas mao ang pagluwas sa kinabuhi sa mga tawo. Apan dili pud kalikayan nga motumaw ang mga pagduda kay lisod usab tuohan dayon nga walay tulobagon ang tag-iya sa awto kay sa initial statement sa hepe sa kapolisan sa Balamban nga walay foul play ang kamatayon sa bata.
Ang mga ginikanan sa bata dili na kuno interesado sa pagpahigayon pa og imbestigasyon, gani gilubong na ang biktima. Bisan pa man sa finding sa Balamban police daw wala makombinse ang kadagkoan nila sa CPPO ug sa PRO7 nga mimando og makuting imbestigasyon.
Tinguha nga mahatagan og katin-awan ang nahitabo sa ingon mahatagan og hustisya ang biktima.
Ingon usab niini ang tinguha sa CHR7 dungan sa pagpadala nila og subpoena sa bombero sa gihimo nilang imbestigasyon. Kung wala gyuy sala ang tag-iya sa sakyanan angayan lang nga malimpyohan ang iyang ngalan apan kun naay sukaranan ang katahap sa usab angayan lang nga atubangon niya ang resulta sa iyang nahimo.
Ang papel sa mga saksi ang maghatag gyud og katin-awan niining tanan kun duna man aron masulbad ang misteryo sa panghitabo. Maayo unta kun dili lang kutob sa imbestigasyon ang gihimo sa mga otoridad kun dili ang resulta gyud ang mahinungdanon. Sa mga ginikanan sa bata unta kamo ang mangusog sa pagpasulbad sa nahitabo sa inyong anak aron mahatagan og hustisya ugaling namatay siya tungod sa rason nga ang nakaingon ra gyud ang nasayod.