Makadismaya ang unang duha ka duwa sa Gilas Pilipinas batok sa Italy ug Serbia sa nagpadayong FIBA World Basketball Championships nga gihimo didto sa China. Nakita didto nga kuwang gyud sa height ang mga Pinoy cagers ug medyo nagkuwang ilang labok nga nakapasamot sa ilang pagkapildi. Bisan paman og gikan sila sa nagkadaiyang dagkong pro-league basketball sama sa Philippine Basketball Association wala kini kaayo makahatag og bentaha kanila isip usa ka team ilabi na batok sa mga nasud gikan sa West.
Ang matag usa kanila lainlain og abilidad apan wala magpasabot nga kun sila tigumon ug usahon makaporma na og lig-ong koponan nga pang world championship.
Daghan ang miingon nga kuwang sa height unya kuwang sab kaayo sa panahon ang Gilas nga makapraktis aron mapalig-on ilang koponan mao nga bisan og daghan nila ang talentado ug kadaghanan may eksperyensiya, biya gihapon sila kun itapad ilang mga kaatbang.
Apan dili naman kini angay pang ikatingala, ang mga sakop sa Gilas pulos kinuha sa mga professional basketball teams sa PBA, may mga tag-iya ang ilang oras.
Busa maayo tingaling ang sunod nga koponang maglangkob sa Gilas dili tanan gikan sa PBA o uban pang pro-league basketball. Pinaagi niini, tanang oras iya sa Gilas aron magporma og lig-ong koponan. Kana kung dunay motabang pagpundo sa ilang pagpangandam. Kinahanglang ang ilang sweldo igo-igo nga ang players dili matintal pagbiya aron mosulod sa pro-league. Kaduha na ka higayon nakasulod ang Gilas sa maong prestihiyosong torneyo, busa dako na kaayo kining kalamposan ug angay na sab untang kapunitan og mga undanong leksyon aron sa sunod mas andam ug lig-on nga koponan ang mapadala sa nasud. May mga kamatuoran gyung lisud dawaton, apan dili makatarunganon nga himuong kataw-anan ug biay-biayan. Kay sagad sa mga nanaway wala gani makasuway sa giagian sa ilang mga gisaway. Angay hinumdoman nga dili lang ang Gilas ang naa sa maong sitwasyon, ang uban sab nga mga nasud. Apan sama sa Gilas, naninguha sab sila bisan nalang makasulod sa prestihiyosong FIBA World Basketball Championships. Total ang gidala ug girepresentar sa Gilas mao man ang bandila sa Pilipinas. Mapildi man o modaog, mas maayong paminawon para sa mga kabataan nga gisuportahan ang koponan sama sa gihimo sa ubang mga nasud sa ilang koponan.