Niadtong niaging semana usa ka babaye ang nikirig dapit sa merkado sa dakbayan sa Lapu-Lapu human gipokpok og bato ang iyang ulo sa usa ka babayeng nalisoan sa pangisip.
Maayo nalang kay naluwas ang naasoyng babaye dihang gitabang siya sa mga tawong nagpakabana.
Dili na kini bag-o nga panghitabo dili lang sa Opon kondili sa tanan seguro nga dapit diin adunay mga tawong walay paminsar nga naglatagaw sa kadalanan.
Sa ilang kondisyon dili mapakasala sila tungod kay wala man lagi masayod sa ilang gibuhat o sa uban pa walay sala ang buang. Dilikado kaayo kini tungod kay kinabuhi baya ang nakataya, unsa kaha kon naay kutsilyo ang buang dayon iduslak sa mga tawong iyang ikasugat, perting pataya gyud sa iyang makursonadahan.
Gikinahanglan nga tutokan sa kagamhanan ang isyu sa mental health diin hatagan og pagtagad kadtong mga buang.
Si Mayor Ahong Chan ang nangunay sa pag rescue sa mga buang sa ilang dakbayan aron mapatambalan kini.
Gipakaon ug gipahiluna ang mga nakuhang buang kinsa ilang giadto sa mental facility sa syudad.
Plano sa mayor nga magbutang og sentro sa mga nawad-an og pangisip tungod kay daghan na kaayo kon didto pa sa syudad sa Sugbo ipaatiman ang mga buang.
Ang dakbayan sa Lapu-Lapu na ang moabaga sa galastohan sa tambal hangtod maayo ug makabalik ang maayong paminsar.
Maayo unta kon masustinihan kining programaha aron masolbad gyud. Hinuon sa record ni Mayor Chan dihang kapitan pa siya sa Pajo natutokan man hinuon ang mga programa ug milahutay.
Karon nga siya ang mayor sa tibuok dakbayan sa Lapu-Lapu posibleng molungtad kini uban sa abag sa katawhan ilabi na sa mga pamilya sa mga buang.
Lisod man kon isalig nalang tanan sa mayor ang responsibilidad nga iya gyud unta sa pamilya.
Kon nahimo kini sa dakbayan sa Lapu-Lapu mahimo usab sa mga silingang syudad sa Mandaue, Lapu-Lapu ug ubang mga LGU kay daghan pa kaayong mga tawong nawala sa ilang kaugalingon nga ga laroy laroy ug dili nato matag-an nga makahimo sila og dakong problema sa ilang iaig ka tawo.
Walay sala ra ba ang buang kon mabiktima ka nila, aron malikayan kini gikinahanglan nga ipahiluna sila ug amomahon hangtod nga mamaayo sila sa ilang balatian.